Ул оешмаларны һәм Татарстан халкын һуманитар ярдәм җыюда актив катнашырга өндәде.
Татарстан президенты Рөстәм Миңнеханов республика хөкүмәтенә Газзә сызыгында зыян күргән халык өчен һуманитар ярдәм җыю эшен оештырырга кушты. Бу хакта аның матбугат хезмәтенә сылтанып, Коммерсант хәбәр итә.
— Зыян күрүчеләр арасында күп балалар булуга татарстаннарның борчылуы сәбәпле, президент оешмаларны һәм Татарстан халкын һуманитар ярдәм җыюда актив катнашырга өнди, — ди Миңнехановның сүзчесе Лилия Галимова.
Аның сүзләренчә, Татарстан хөкүмәте кирәкле тауар һәм азык-төлек исемлеген төзи һәм һуманитар ярдәм җыю урынын барлый.
Ярдәм җыю өчен җаваплы булып Татарстан вице-премьеры Ләйлә Фазлыева билгеләнгән.
- 7 октябрь көнне Израилгә Газзә сызыгыннан атышлар башланды. ХӘМӘС сугышчылары Израил җиренә керде.
- Израил Газзә сызыгының тулысынча блокадада калуын игълан итте. Газзә сызыгы ике яклап Израил белән һәм бер яклап Мисыр белән чиктәш.
- Израил Хәмәснең 7 октябрьдә һөҗүм ясавына җавап итеп "Тимер кылычлар" дигән хәрби операция уздыра.
- Хәмәс контролендәге Газзә сызыгы хакимиятләре Израил гаскәре атышлары аркасында сигез меңнән артык кеше үлде дип белдерә. Бу саннар бәйсез расланмаган.
- Сишәмбе кичендә Газзәнең төньягындагы качаклар лагерендә шартлау булды. "Израил һөҗүме фаҗигаи нәтиҗәләргә китерде. Күп кешеләр аның корбаны булды", дип яза шаһитләргә һәм табибларга таянып CNN. Израил исә һөҗүмнең максаты - Хәмәс радикаль төркеменең югары дәрәҗәле хәрби җитәкчесе иде дип белдерә.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!