Украина Югары Радасында 16176 номерлы канун өлгесе теркәлгән. Ул Украинаның төп халыкларының вәкиллекле оешмалары эшчәнлегенә кагылышлы кануннарга үзгәрешләр кертүне күздә тота. Документ кырымтатарлар, караимнар һәм крымчакларның хокукларын тәэмин итүгә юнәлдерелгән. Бу хакта Украина Югары Радасы депутаты Тамила Ташева хәбәр итте.
Аның сүзләренчә, канун өлгесе кырымтатар халкы Мәҗлесе башлангычы белән әзерләнгән. Документны эшләүдә Мәҗлес вәкилләре, шул исәптән аның рәисе Рефат Чубаров, халык депутатлары Мостафа Җәмилев һәм Әхтәм Чийгоз, шулай ук Украина Юстиция министрлыгы вәкилләре катнашкан.
"Бу канун өлгесе кырымтатарлар, караимнар һәм крымчакларның хокукларын яклаячак ныклы хокукый нигез булдыруга багышланган. Ул төп халыкларның вәкиллекле органнарына Украинаның "Төп халыклар турында" канунында каралган хокукларын нәтиҗәле тормышка ашырырга ярдәм итәргә тиеш", — дип белдергән Ташева.
Депутат фикеренчә, канун өлгесен кабул итү Украинаның төп халыклар хокукларын яклау йөкләмәләрен үтәүдә тагын бер адым булачак.
"Кырым оккупациядән азат ителгәннән соң һәм ярымутрауны торгызу барышында мондый һәм башка кораллар аеруча мөһим булачак. Алар ярымутрауны яңадан берләштерүгә һәм халыкның үз туган, ирекле йортын торгызуда чынлап та катнашуына нигез булып хезмәт итәчәк", — дип ассызыклаган Ташева.
Украина Югары Радасы сайтындагы мәгълүматка караганда, 16176 санлы канун өлгесе 2026 елның 22 октябрендә теркәлгән. Тамила Ташевадан тыш, аны тәкъдим итүчеләр арасында Мостафа Җәмилев, Әхтәм Чийгоз, Югары Рада рәисенең беренче урынбасары Александр Корниенко һәм башка депутатлар бар. Документ парламентның тиешле комитетында карауга җибәрелгән.
2021 елның июлендә Украина Югары Радасы "Украинаның төп халыклары турында" канун кабул иткән иде. Ул кырымтатарларны, караимнарны һәм крымчакларны илнең төп халыклары дип таный. Канун аларның мәдәният, мәгариф һәм тел өлкәләрендәге төп хокукларын билгели, шулай ук төп халыкларның вәкиллекле органнарын төзү һәм аларның эшчәнлеген оештыру тәртибен күздә тота.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!