Accessibility links

сишәмбе, 6 декабрь 2016, Казан вакыты 08:49

Omskida iğänäçelär küpme?


Omskida 2005 yılda alıp barılğan iğänäçelek eşlärenä yomğaqlaw yasaldı. Uzğan atnada bu eştä ayıruça aktiv qatnaşuçılarğa diplomnar häm büläklär tapşıru serremoniäse bulıp uzdı.

“İğänäçelek sezonı” dip isemlängän bu aksiälär Omskida inde 8 yıl rättän ölkäneñ İctimaği palatası tarafınnan oyıştırılıp kilä. Aksiälärneñ töp maqsatı – xalıqnıñ sotsial' yaqlanmağan qatlamnarına yärdäm kürsätü, şäfqat'lelek häm xäyriäçelekkä iğtibar cälep itterü, eşmäkärlekneñ sotsial' cawaplılığın üsterü. Dörestän dä, yärdäm kürsätüçelärneñ sanı yıldan-yıl arta bara. Oyıştıruçılar süzlärençä, 2004 yılda bu san 500-gä yaqın bulğan bulsa, 2005 yılda 800-dän artıp kitkän. Yärdäm aluçılarnıñ sanı da 100 meñ keşedän 180 meñgä citkän.

Älege serremoniä barışında sotsial' yärdäm kürsätüdä zur öleş kertkän 100-dän artıq iğänäçegä diplomnar tapşırıldı. Büläklänüçelär arasında millättäşlärebez dä buldı. Aktiv iğänäçe diplomnarı belän yäşüsmerlär belän eşläwçe sotsial' pedagoglar Nailä Räşitova, Lutfiä Faxrutdinova büläkländelär. “Ömet belän yäşä” oyışmasınnan Lälä Alimovağa istälekle büläk tapşırıldı.

Büläklänüçelär arasında sostavında törle millät balaları bulğan “Kapriz” vokal' ansamble dä bar ide. Ansambl'neñ citäkçese Viktoriä İnozemseva kollektivınıñ qazanışları turında bäyän itte.

Noyäber ayında Tuapse şähärendä ütkän “Rusiä börketläre” bäygesendä “Kapriz” ansambleneñ berençe urınnı ayulawı, ğinwar ayında Sankt-Peterburgta “Yoldızlar balqışı” konkursında 3-nçe urınğa layıq buluı turında söyläde.

Viktoriä Viktorovna ansambleneñ näni cırçısı İnara Möxämädiewanıñ uñışların ayırım bilgeläp ütte. Tuapseda İnara “yalğız başqaruçı” nominatsiäsendä ikençe urın ayulağan. Sankt-Peterburgta 10 yäşlek bu qızçıqnı xalıqara maturlıq konkursına saylap alğannar, aña räsmi çaqıru birelgän.

Östäp şunı äytergä mömkin, İnara tatar cırların da yaratıp başqara, “Umırzaya”, “Ömet” kollektivları konsertlarında da çığışlar yasıy. Tamaşaçı anı härwaqıt yaratıp qabul itä.

Omskida tatar milli xäräkäteneñ mädäniät yünäleşendäge eşläreneñ, başqa yünäleştägelärenä qarağanda küpkä uñışlıraq baruı turında “Azatlıq” tıñlawçılarına citkergänebez bar inde. Ölkäneñ awıl rayonnarında, Omski häm Tara şähärlärendä tatar üzeşçän sänğät kollektivları eşli. “Umırzaya” , “Mäxäbbät”, “Naza”, “Yäşlek”, “Nur”, “Çişmä” kollektivları ölkädä yäşäwçe millättäşlärebezgä härdaim tatar cırları-moñnarı citkerep, küpmeder däräcädä xalıqnıñ ruxi ixtiacın qänäğät'ländep toralar. Döres, qaywaqıtta yaña kollektivlar da barlıqqa kilgäli, qızğanıçqa, alarnıñ kübese qısqa ğömerle bula. Şulay, monnan 6-7 yıllar elek “İsker”, “Rezidä”, “Duslıq” kollektivları oyışıp eşli başlağan idelär. Ämma alarnıñ eşçänlekläre berniçä konsert quyudan alğa kitmäde. Omskida bıyıl tatar mädäniäte ofığında tağın ber kollektiv tuıp kilä. Malunsev isemendäge mädäniät sarayı qarşında konsertlar, yal kiçäläre oyıştıru belän şöğellänergä niätläwçe ber törkem yäşlär uzğan yäkşämbedä “Uynağız garmunnar” dip isemlängän konsert-kiçä oyıştırdılar. Döres, aldan bu çara garmunçılar bäygese dip xäbär itelgän, häm, xätta iğänäçelär tabılıp, büläklär dä äzerlängän ide. Ämma waqıtı kilep citkändä, konkurs däräcäsendä oyıştıru eşläre başqarılmaw säbäple, niätlängän bäyge bulmıy qaldı. Konkursqa äzerlängän garmunçılar säxnädä bergäläp tezmä uynadılar, soñınnan qayberläre cırlar başqarıp, yäisä garmun uynap ayırım çığışlar yasadılar. Annan tış bu konsertta qayçandır “Umırzaya” ansamblendä şöğellängän cırçılar häm biüçelär qatnaştı. Ä büläklärne isä oyıştıruçılar, konsertta çığış yasawçılarğa taratıp çıqtılar. Şulay itep bu çara ğädäti konsert häm biyü kiçäse räweşendä uzdı.

Oyıştıruçılarnıñ berse bulğan Rezidä Fättäxovağa min, maqsatlarığız nindi,-digän soraw yulladım.

Rezidä: Minem küptän inde üzebezneñ Omskida yäşägän bayançılar belän tanıştırasım kilä ide xalıqnı, şul uy belän bügen cıyasım kilgän ide küp kenä xalıqnı da, Omskida yäşäwçe tatarlarnı, üzebezneñ bayançılarnı da.

Bu inde sezneñ oyışma bulamı, ayırım eşläwçe ber estrada törkeme kebek gruppa bulamı?

Şul estradalar belän, xalıq köyläre belän, barısın bergä quşıp, yaña ber yünäleş alasım kilä.

Bu Rezidä Fättäxova buldı.

Rozaliä Sayganova, Omski

XS
SM
MD
LG