Ğiraqnıñ Mikdadiä şähärendä politsiä bülege häm mäxkämä binasına ğisyançılarnıñ höcüme näticäsendä, kimendä 15 qarawılçı häm politsiä xezmätkäre üterelgän. Höcüm yasawçılar bu binadağı totqınnarnı azat itä alğan. 20 martta Ğiraqta xärbi operatsiä başlanğanğa 3 yıl tuldı. AQŞ prezidentı George Bush Ğiraqtağı uñay üzgäreşlärne dä iskä alıp, ildäge wazgiät älegä totrıqlı tügel, dip belderde. Ğiraqnıñ elekke premier-ministrı Ayad Allawi Reuters ağentlığına birgän äñgämäsendä bolay dide: «Ğiraqta barısı da tärtiptä dip äytsäk döres bulmas ide. İl hiçşiksez watandaşlar suğışı aldında tora. Min inde BBC ağentlığına birgän äñgämädä, wazgiätne cayğa saluğa ömetlänäbez, dip äyttem. İñ möhime, watandaşlar arasındağı nizağ, çığırınnan çığıp kitmäsen. Ägär dä bu xäl kilep çıqsa, xälne tözätü bik awır bulaçaq”, dide, Ğiraqnıñ elekke premier-ministrı Allawi. Şul uq waqıtta, Quşma Ştatlar häm Britaniä Ğiraqta watandaşlar suğışı başlanıp kitüne kire qağa.
