Bäxäsle saylawlardan soñ bügen Alyaksandr Lukaşenka 3nçe möddätkä Belarus prezidentı wazifasına kereşte. Minskidağı Cömhüriät Sarayında Lukaşenka ant kiterde:
"Belarus prezidentı wazifasına kereşep, min Belarus xalqına xezmät itergä, keşe xoquqların häm irekleklären xörmät itergä häm yaqlarğa, Belarusnıñ konstitusiäsen ütärgä häm yaqlarğa, miña yöklängän yuğarı wazifanı namusım belän ütärgä ant itäm."
Lukaşenka xakimiätkä 1994nçe yılda kilde. Bügen inaugurasiädän soñ yasağan qısqa çığışında, prezident, Belarus xalqı, Ukraina häm Görcistanda citäkçelekne alıştırırğa yärdäm itkän oppozisiäne yaqlamadı, dip belderde.
Oppozisiä, könbatış xökümätläre häm küzätüçeläre 19 martta bulğan saylawlarnı ğädel tügel dip ğäyepläp çıqtı.
Tawış birüdän soñ 5 kön däwam itkän uram cıyınnarı waqıtında yözlägän keşe qulğa alındı, alarnıñ kübese 15 kön törmägä xökem itelde. Lukaşenkanıñ wazifasına kereşü tantanası, inaugurasiädän soñ Minskida xärbi parad häm törle konsert-tamaşalar buldı.
Düşämbe könne Yevropa Berlegeneñ tışqı eşlär ministrları viza birü tıyılğan Belarus räsmiläre isemlegen tikşeräçäk. İsemlektä berençe keşe – prezident Lukaşenka, barlığı 31 keşe.
