Accessibility links

пәнҗешәмбе, 8 декабрь 2016, Казан вакыты 10:54

Başqortstan wäkillege Törkiägä kitte


Comğa irtäsendä Başqortstannıñ zur ğına wäkillege Törkiägä eş häm qunaq säfärenä kitte. Bu wäkillekkä Başqortstan Prezidentı xakimiäte başlığı Radiy Xäbirov belän vitse-premyer, Başqortstan Mädäniät häm milli säyäsät ministrı İldus İlişev citäkçelek itä. Delegatsiä bik zur, cämğısı 120 dän artıq keşene üz eçenä ala ul. Bu qädär xalıqnıñ yıraq çit ilgä baruınıñ säbäbe ğadi. Törkiäneñ İstanbul şähärendä bu könnärdä Başqortstan mädäniäte könnäre ütä. Şuña kürä andağı säfärgä räsmi şäxeslär belän eşlekle dairälär genä tügel, ä baytaq qına icadi zıyalılar häm sänğät ähelläre dä iärtelde.

Şunısı üzençälekle – bik zur däräcä biläsä dä, moñarçı Başqortstan Prezidentı xakimiäte başlığı Radiy Xäbirovnıñ, ni öçender, yıraq çit illärgä räsmi wäkillek belän barğanı yuq ide. Ämma bu oçraqta ber üzençälek bar. Tuqsanınçı yıllar başında Radiy Xäbirov Änqaradağı Bilkänt universitetında ike yıl däwamında belem ala. Şuña kürä ul törek telen yaxşı ğına üzläştergän häm anda anıñ baytaq qına dusları qalğanlığı mäğlüm. Başqortstan wäkillege eçendä tağın berniçä ministr, şul isäptän Tışqı iqtisadıy elemtälär häm säwdä ministrı Boris Qolbin belän Mäğärif ministrı Zöhrä Räxmätulina da bar. Başqortstannıñ Qazaqstandağı daimi wäkile İrjan Azanov ta kitte bu wäkillek belän bergä.

Başqortstan wäkillege İstanbulda säfärdä 6 yüngä qädär bulaçaq. Ä säfärneñ berençe könendä Başqortstannıñ räsmi häm eşlekle dairäläre İstanbulda ütkän Rusiä-Törkiä eşlekle şurası utırışında qatnaştı. Anda Başqortstannıñ illegä yaqın şirkäte malları täqdir itelde.

Aldan mäğlüm programma buyınça, şimbä könne Başqortstan wäkilläre İstanbulda ütäçäk milli bäyräm – Sabantuyda qatnaşa. Anda respublikanıñ sänğät ostaları çığışları qaralğan. Ä kiçen İstanbulda Başqortstan mädäniäte könnären räsmi açu tantanası oyıştırıla. Şunda uq Mäcit Ğafuri isemendäge Başqort däwlät akademiä drama teatrı artistları tamaşaçılarğa “Qodaça” spektaklen kürsätäçäk.

4 yün könne İstanbulda Başqortstan wäkillege tarafınnan oyıştırılğan berniçä kürgäzmä eşläyäçäk. Ber kürgäzmädä Başqortstannıñ tarixı häm bügengese belän tanışırğa mömkin bulsa, ikençesendä talantlı balalarnıñ qul eşläre kürsäteläçäk. Şulay uq biredä tanılğan tatar fotorässamı Ramil Kilmämätovnıñ “Qoyaş balaları” dip isemlängän fotokürgäzmäse dä açıla. Anda Ramil äfände bıltır üzeneñ Törkiägä ike atnalıq säfäre barışında töşergän surätlären quya.

5 yün könne Başqortstan wäkillege baytaq qına mädäni çaralarda qatnaşa. Şulay uq Başqortstan sänğät ostaları – filarmoniä cırçıları häm Fäyzi Gaskärov isemendäge xalıq yülläre däwlät ansamble artistları gala-konsert ta kürsätä.

6 yün könne Başqortstan wäkillege Ufağa äylänep qaytaçaq. Şuşı könnärdä Törkiädä Tatarstannıñ da zur ğına wäkillege eş häm icat säfärendä yöri. Şulay itep, bu könnärdä Törkiä cämäğätçelege tatar häm başqort xalıqlarınıñ, Tatarstan belän Başqortstannıñ tarixı häm bügengese xaqında küp kenä mäğlümat alıp, yaqınnan tanışıp qalu mömkinlegenä iä. Törkiädä yäşäwçe millättäşlär öçen dä zur bäyräm bu, älbättä.

XS
SM
MD
LG