Başqortstanda comğa könne yıl da ütüçe Aksakov könnäre başlandı. Bu bäyräm 1 üktäbergä qädär däwam itäçäk. Anda qatnaşu öçen, kürşe töbäklärdän dä baytaq qunaqlar kilde.
XVI Xalıqara Aksakov bäyräme qısalarındağı mädäni çaralar şaqtıy. Yıl da oyıştırıluçı bu olı bäyräm bıyıl tağın da eçtälekleräk bulır dip kötelä. Anıñ bay mädäni programmasına yözlärçä sänğät'kärlär, yazuçılar, şağirlär, jurnalistlar häm ädäbiät söyüçelär cälep itelgän.
Bäyrämneñ täwge köne Ufada Aksakov uquları belän başlanıp kitte. Çarada tatar häm başqort ädipläre dä qatnaştı. Bu uqularnı tantanalı açuda qatnaşqan BR Xökümäte räise urınbasarı, mädäniät häm milli säyäsät ministrı İldus İlişev ta çığış yasadı. “Sergey Aksakov üzeneñ törki tamırları, törki çığışı belän gel ğorurlanğan”, dip assızıqladı İlişev äfände.
Bäyräm çaraları Ufanıñ Şaqşa bistäsendä dä däwam itte. Näq menä şundağı Qasıym awılında Sergey Aksakovnıñ babasınıñ yort-cirläre bulğan. Töştän soñ bäyrämdä qatnaşuçılar häm çit töbäklärdän kilgän qunaqlar Aksakov mäktäp-gimnaziäsenä kilde häm anda açıq däreslärdäge mädäni çaralarda buldı. Artaban Ufanıñ Puşkin alleyasendäge Aksakov häykälenä çäçkälär salu tantanası ütte.
Aksakov bäyräme aldağı könnärdä Bäläbäy häm Qırmısqalı rayonnarında däwam itäçäk. Anda qunaqlar, här yıldağıça, Aksakov şifaxanäsendä häm Nadejdino awılındağı tarixi-mädäni üzäktä fol'klor bäyrämendä qatnaşa. Ä 1 üktäber könne bäyräm çaraları Ufa yanındağı Zubovo awılına küçä. Anda Sergey Aksakovnıñ babasınıñ bilämälärendä fol'klor törkemnäre zur konsert kürsätäçäk.
Fänis Fätxi, Ufa
