Accessibility links

шимбә, 10 декабрь 2016, Казан вакыты 13:46

Başqortstanda Aqmullanı xörmätlilär


Başqortstanda tatar häm başqort xalıqlarınıñ oluğ şäxese, mäğrifätçe häm şağir Miftaxetdin Aqmullanıñ tuuına 175 yıl tulu uñayınnan başlanğan bäyräm çaraları däwam itä. Comğa könne Ufada bu bäyrämneñ çirattağı çaraları Başqortstan däwlät pedagogiä universitetındağı xalıqara fänni-ğamäli konferensiä belän başlandı. “Aqmulla mirası ğasırlar aşa” dip isemlängän bu cıyın çınlap ta xalıqara däräcäsen aldı. Anda qatnaşu öçen Qazaqstannan, Yaponiädän häm Almaniädän kiñ bilgele ğalimnär kilde. Zur ğına wäkillekne Tatarstannan da qabul ittelär.

Başqortstan däwlät pedagogiä universitetı bıyıl Miftaxetdin Aqmulla isemen yörtä başlağan ide. Şuña kürä bu möhim cıyınnıñ näq menä şuşı yuğarı uqu yortında ütüe tabiği dä. Annan bu konferensiägä qädär ük monda ber atna buyı “Aqmulla uquları” iseme astında törle çaralar kön dä oyıştırıldı.

Konferensiäne dä anıñ rektorı Rail Äsadullin açtı häm alıp bardı. “Aqmulla çın duslıq ilçese ide, ul tatar balaların tatarça, başqort balaların başqortça, qazaq balaların üz ana tellärendä uqıtu sälätenä iä tel belgeçe ide”, - dip bäyäläde Rail äfände.

Qazaqstannan kilgän tanılğan qazaq ğalime Bekejan Axan üzeneñ dokladında Aqmullanıñ Qazaqstandağı çorı eşçänlege xaqında bay mäğlümatlar birde. Tatarnıñ kürenekle şäxesläre Märcäni, Fäesxanov, Nasıyrovlar kebek ük Aqmulla da törle törki xalıqlarğa añ-belem taratqan, dip assızıqladı ul.

Respublikanıñ mäğärif ministrı Sıntimer Bayazitov üz çığışı başında premyer-ministr Rafael' Baydäülätovnıñ konferensiädä qatnaşuçılarğa qotlawın uqıp işetterde.

Konferensiädä töp doklad belän pedagogiä universitetı dotsentı, Aqmulla isemendäge büläk iäse Äxät Vil'danov çığış yasadı. Ul Miftaxetdin Aqmullanı başqortnıñ ädäbi telenä nigez saluçılarnıñ berse, dip atadı.

Tanılğan ğalim Ğaysa Xösäenov ta şul uq fikerne qüätläde häm äle anıñ icatın öyränügä küp köç salası bar, dide.

Töştän soñ konferensiäneñ seksiälärdä eşläw öleşe başlandı. Anda törle taraflardan kilgän utızdan artıq ğalimneñ çığışları tıñlandı.

Ä kiçen bäyräm çaraları Başqortstan däwlät opera häm balet teatrına küçte. Anda respublikanıñ yuğarı citäkçeläre qatnaşlığında tantanalı kiçä häm zur konsert buldı. Şimbä könne bäyräm çaraları Miftaxetdin Aqmullanıñ tuğan yağında – Miäkä rayonında däwam itäçäk.

XS
SM
MD
LG