Başqortstanda möselmannarnıñ iñ zur bäyrämnäreneñ berse – Qorban ğäyetenä soñğı äzerleklär bara. Küp din qärdäşlär, aldan uq qorbanlıq sarıqlar da äzerlägän inde. Mäçetlär häm dini mäxällälär, kümäk xucalıqlardan satıp alu öçen, şulay uq küpme qorbanlıq mal kiräk bulaçağın kileşep quyğan.
Ufada da Qorban bäyräm barlıq mäçetlärdä häm mäxällälärdä zurlap bilgelänäçäk. Başqortstan Respublikası
Möselmannarı diniä näzaratı räise, möfti Nurmöxämät Niğmätullin äytüençä, bäyräm wäğäzlären tıñlarğa teläwçelär Ufanıñ Tuqay uramındağı iñ borınğı Cämiğ mäçetenä, «Lälä-Tyul'pan» mäçetenä, «İxlas», «Ğufran» mäçetlärenä häm törle mäxällälärdä oyıştırıluçı tantanalarğa kilä ala. Nurmöxämät xäzrät “Azatlıq” radiosı aşa barlıq din qärdäşlärne izge bäyräm belän qotlaw telägen dä belderde.
Ufada Qorban ğäyeteneñ berençe könendä küp urınnarda irtänge bäyräm wäğäzlären tıñlap, namaz uqığannan soñ, qorban çalular başlanaçaq. Misal öçen, «İxlas» mäçete ixatasında ğına da qorban çalu öçen, din qärdäşlärebez, 200 dän artıq sarıq häm biş sıyır satıp alu üteneçen belderep, aldan uq möräcäğät itep quyğan. Çit illärdä yäşäwçe millättäşlärebez dä aqçaların cibärep, tuğan-tumaçaları istälegenä häm Allah räxmäte öçen, qorban çaldıra biredä. Bıyıl da çit mämläkätlärdäge distädän artıq keşedän şundıy ğözer bar. Amerikanıñ San-Fransisko şähärendä yäşäwçe millättäşebez Orqıya Dayan, izge bäyrämebezne dusları belän bergäläp bilgelärgä häm qorban çaldırırğa dip, Ğäyet aldınnan ğına berniçä yıl rättän Ufağa kilde. Bıyıl kilä almasa da, tormış iptäşe Dayan ağa belän qorban çaldıruı öçen,
“İxlas” mäçetenä möräcäğät itkän häm tieşle aqçasın cibärgän alar.
Bu könnärdä Qorban bäyrämgä turı kiterep qayber rayonnarda yaña mäçetlär dä açıla. Şuşı atna başında ğına Däwläkän rayonınıñ İmay-Qaramalı awılında yaña mäçet açılğan ide. Ä comğa könne Stärletamak rayonınıñ Talaç isemle tatar awılı xalqı da şundıy bäxetkä ireşte. Kirpeçtän salınğan mähabät mäçetne açıp, anda kümäkläp täwge namaznı da uqıdılar. Ğäyet bäyrämenä dä awıldaşlar şunda cıyılaçaq.
Qorban ğäyeten dini oyışmalar ğına tügel, ä Ufadağı qayber sänğät oyışmaları häm säwdä üzäkläre dä kiñ bilgeli. Misal öçen, 31 dekaberdä häm berençe ğinwar könnärendä Başqortstan däwlät filarmoniäsendä häm Mäcit Ğafuri isemendäge Başqort däwlät akademiä drama teatrında üzençälekle kiçälär oyıştırıla. Ufanıñ zur säwdä üzäkläre häm bazarları bu könnärdä şulay uq, säxnä yoldızların cälep itep, bäyräm tantanaları ütkärergä, xalıqqa xäyer taratırğa häm bäyrämgä kilüçelärne xuş isle pılaw, başqa milli rizıqlarıbız belän sıylarğa äzerlänä.
Qorban ğäyete ğibädätläre 31 dekaber könne irtänge säğätlärdä ük başlana. Ufadağı “Lälä-Tyul'pan” mäçetendäge bäyräm çaraları televidenie aşa turı efirda kürsäteläçäk.
