Tatar dönyasında aprel' ayı - şiğriät ayı bularaq bilgelänep ütelä. Bu uñaydan Udmurtiädä dä bu ayda küptörle oçraşular, şiğriät bäyrämnäre, mäktäplärdä maxsus ana tele däresläre dä şuşı temağa bağışlanıp uzdırıla. Yış qına şuşındıy däreslärdä, çaralarda Qazannan tatar yazuçıları, şağirläreneñ qatnaşuı da matur ber ğädätkä äwerelde. Şuşı könnärdä genä İjawda tatarlarnıñ töp jurnalları «Qazan utları» jurnalınıñ baş möxärrire Rawil Fäyzullin citäkçelegendä ber törkem yazuçılar bulıp kitte. Alar başta İjawdağı tatar klassik gimnaziäsendä uquçılar, uqıtuçılar belän oçraştı. Älege küreşüdän Rawil Fäyzullin zur qänäğätlänü xisen belderde.
Gimnaziädän jurnalistlar «Spartak» xalıq icat yortına yul aldı. Biredä Udmurtiä cirendä yäşäp icat itüçe millättäşlärebez häm tatar kitapların, jurnalların yaratıp uquçılar belän oçraştı. İñ berençe çiratta Rawil Fäyzullin «Qazan utları» jurnalınıñ maxsus meñençe sanın xalıqqa täqdir itte. Jurnalnı näşer itüdä qatnaşqan Rifqät Yunıs bu xaqta cıyılğan xalıqqa täfsilläp söyläde. Ğazinur Morat, Rädif Säğdi üzläreneñ icatları belän tanıştırdılar. Kitap uquçılarnıñ küpsanlı sorawlarına cawap birdelär. Tatar kitapların uquçılar kimede digän süzlär xaqsız, dip basım yasadı äñgämäbezdä Rädif Säğdi.
«Qazan utları» jurnalınıñ baş möxärrire Rawil Fäyzullin şuşındıy oçraşularnıñ küñelle häm ike yaq öçen dä kiräkle buluın bilgeläde. Şuşındıy aralaşu Rossiäneñ küp kenä töbäklärendä bulıp uzğan, kiläçäktä tağın berniçä tatarlar kümäk yäşägän töbäklärgä yul totaçaqbız dip urtaqlaştı.
Rawil Fäyzullin şulay uq şuşındıy oçraşulardan yulyazmalar ğına tügel, töbäklärdä icat itüçelärneñ äsärlären tuplap, «Qazan utları» jurnalında bastıru turında da planlaştırabız dip belderde.
Dimäk, üz soğında qaynap yatqan millättäşlärebez icatı zur jurnallarda dönya kürep, alar belän küp kenä uquçılar da tanışa alaçaq.
Xämidä Ğayfullina, Udmurtiä
