Accessibility links

дүшәмбе, 5 декабрь 2016, Казан вакыты 21:47

Qıtay SARS virusın ciñä almıy


Üpkä yalqınsınuınıñ yaña töre, SARS virusı belän awıruçılar sanı Kanada, Singapur, Hong Kong häm Veyatnamda kimi bara, läkin Qıtaydan, kiresençä, yañadan yaña awırular turında xäbärlär kilä. Dönya Sälämätlek Oyışması xäbär itüençä Qıtayda SARStan 139 keşe ülgän, 3 meñnän artıq keşe bu çirne yoqtırğan. Oyışmanıñ Qıtaydağı wäkile Henk Bekedam, ildäge sälämätlek saqlaw sisteması virusnı ciñä almıy, dip belderde: “Qıtaydağı cämäğätçelek sälämätlek saqlaw ölkäsenä soñğı 20 yıllap aqça kertelmägän, şunıñ öçen ildä SARS kebek citdi awırunı yuq itergä äzer buluına ışana almıym. Uzğan atnada bez xökümät belän bu sistemağa qaydan aqça tabu turında uyladıq, dip belderde Bekedam. Asia däwlätläre wäkilläre irtägä bolar xaqında söyläşüer öçen Bankokta cıyıla. Dönya Sälämätlek Oyışması, Vyetnamnı-SARS virusı taralğan illär isemlegennän alırğa täqdim itte. Biredä soñğı 20 köndä çirne yoqtıru oçraqları bulmağan. Vyetnamda bu awırudan 5 keşe ülde, 63 keşe çirne yoqtırdı. Qıtaynıñ Guangdong provinsiäsendä çığıp dönya buylap tarala barğan SARS virusınnan 340 keşe ülde, 5 meñnän artıq keşe çirne yoqtırğan dip isäplänä. Awıruçılarnıñ 6%tı ülä. Şimbä könne Dönya Sälämätlek Oyışması xezmätkäre, virusqa däwa ezläw eşe berniçä yılğa suzılırğa mömkin, dip belderde.

XS
SM
MD
LG