Qabul. Äfğan xakimiate bügen başqala Qabulda, ilneñ törle töbäklärendäge yaqınça 100 meñläp suğışçını qoralsızlandıru, xärbi xezmättän cibärü häm alarnı yañadan cämğiatkä qaytaru eşlären alıp baraçaq maxsus idarä açtı. "Yaña başlanğıçlar" dip atalğan şuşı programma Berläşkän Millätlär häm başqa xalıqara oyışmalar yardämendä buldırıldı. Äfğanstannıñ vitse-prezidentı Kärim Xälili, ägär dä şuşı programmanı ğämälgä aşırıp bulmasa, bu il öçen awır näticälärgä kiteräçäk, şuña kürä äfğan xökümäte anıñ uñışqa ireşüwe öçen xälennän kilgäneneñ barın da eşliäçäk dip belderde. Qabuldağı üzäk xakimiat inde berniçä märtäbä ildäge törle qorallı törkemnärne qoralsızlandırıp qarağan ide, läkin bu tırışlıqlar ällä ni uñışlı bulmadı. Yaña programmada xäzer, qoralın tapşırğan keşelärgä maxsus tanıqlıq birü qarala, alar şunıñ nigezendä maxsus taşlamalarğa - küpmeder aqçağa, eş künegüläre ütkärügä, kredit alu xoquqına iä bulaçaq.
