Accessibility links

якшәмбе, 4 декабрь 2016, Казан вакыты 15:16

Tatarstan bäyrämnärgä äzerlänä...


30nçı avgust – Respublika häm Qazan şähäre könnäre uñayınnan şaqtıy programma äzerlängän. Qayber çaralar inde ütkärelä da başladı. Çärşämbe könne başqalanıñ Kazanskaya yarmarka dip isemlängän kürgäzmälär üzägendä Oçraşu urını – Qazan digän 11nçe Xalıqara säwdä-sänäğät kürgäzmäse açıldı. Bu çara respublika sänäğäteneñ mömkinlekläre belän xalıqara eşmäkärlärne tanıştıru häm Tatarstannıñ säwdä elemtälären nığıtu niätennän ütkärelä. Kürgäzmä üzeneñ eşen 30nçı avgustqa qädär däwam itäçäk. Şul uq könne Tübän Kamada da ber qızıqlı kürgäzmä eşli başladı. Ul respublikanıñ xalıq hönäre belän tanıştıra. 28nçe avgust könne isä Qazan ippodromında bäyräm uñayınnan at yarışları açılaçaq.

Qazanğa inde bäyrämgä dip çaqırılğan qunaqlar da kilä başladı. Mäsälän, çärşämbe könne başqalabız Rusiäneñ törle töbäklärennän, BDB häm yıraq çit illärdän kilgän jurnalistlarnı qarşıladı. Delegatsiädä törle mäğlümat çaralarınnan 50dän artıq wäkile bar. Alar arasında Komsomolskaya pravda, Rossiyskaya gazeta, Moskovskie novosti gazetalarınıñ, Ren-TV, Rossiya telekanallarınıñ wäkilläre, Katarnıñ Äl’-Dcazira kompaniäse xäbärçese Äkräm Xazam, jurnalistlar berlegeneñ xalıqara konfederatsiäse citäkçese Aşot Djazoyan, Rusiä jurnalistları berlege räise Vsevolod Bogdanov ta bar. Qunaqlar Tatarstan, Qazan belän tanışaçaq. Şulay uq jurnalistlarnı Qazan xakimiätendä dä qızıqlı söyläşülär kötä. Monda alar “Meñyıllıq Qazan – dönya mädäniäte şähäre” dip isemlängän tügäräk östäl utırışında qatnaşaçaq, respublikanıñ häm şähärneñ üseş plannarı belän tanışa alaçaq. Delegatsiä wäkilläre bäyräm çaralarında da aktiv qatnaşır dip kötelä. Çärşämbe könne töştän soñ jurnalistlar respublikanıñ dini citäkçeläre belän oçraştılar. Jurnalistlarnıñ älege vizitı Rusiä häm xalıqara cämäğätçelekne respublika, anıñ borınğı, meñyıllıq tarixı bulğan başqalası belän tanıştıru niätennän oyıştırıldı. Qunaqtan qaytqaç, älege jurnalistlar üzläreneñ mäğlümat çaraları aşa Tatarstan, Qazan turında mäğlümat taratırlar digän ömettä qalalar oyıştıruçılar.



Tatarstanda 30nçı avgustta uzaçaq zur bäyrämgä, inde äytkänebezçä, qunaqlar bik küp kiläçäk. Alar arasında Rusiädäge çit il wäkilçelekläreneñ diplomatları dä bar. Alar Qazanda 30-31nçe avgust könnärendä bulaçaq häm Mintimer Şäymiev belän oçraşıp, başqalabız belän tanışıp, bäyräm çaralarında qatnaşaçaq.

XS
SM
MD
LG