Accessibility links

пәнҗешәмбе, 8 декабрь 2016, Казан вакыты 21:12

Äfğanstannıñ yaña konstitutsiä ölgese räsmi tantanada prezident Hamid Qarzaiğa tapşırıldı


Taliban çorınnan soñ tözelgän yaña konstitutsiä ölgese bügen Äfğanstannıñ prezidentı Hamid Qarzai'ğa, şulay uq elekke patşa Möhammäd Zahir Şah'qa häm bu könnärdä Qabulda bulğan xalıqara diplomatlarğa täqdim itelde. 160 bitlek töp qanun däwlät qaramağındağı konstitutsiä komissiäse tarafınnan äzerlängän. Äfğanstan konstitutsiäse mäs'äläsendä eş aylarça däwam itte.

Qabulda uzğan räsmi tantanada prezident Qarzaiğa konstitustiä ölgesen anı tözegän maxsus komissiä räise Nematullah Şahrani tapşırdı: "Xodaynıñ räxmäte, bez bügen sezgä Äfğan xalqınıñ milli dokumentı, Äfğanstannıñ İslam Küçeş Çorı Xakimiäte konstitutsiäseneñ ölgesen tapşırabız, " dide Şahrani...

Töp qanun ölgese – Taliban çorınnan soñ Äfğanstanda säyäsi sistemanı bilgeläwgä taba möhim adım bulıp tora. Kiläse ayda 500 äğzalek Loya Jirga şurası konstitutsiä ölgesen tikşerep üz qararın qabul itäçäk.

Komissiä wäkile Şukrä Barikzai, jurnalistlarğa, yaña konstitutsiä ölgesendä töp wäkälätlär Äfğan prezidentı häm ike palatadan torğan parlamentqa birelä, dip belderde. İlneñ prezidentı xalıq tarafınnan saylanaçaq. Yaña konstitutsiä Äfğan cämğiätendä İslamnıñ role zur buluın tanıy, läkin Şariğat qanunnarı yuridik sistemanıñ nigeze bulmayaçaq, dip xäbär itelde.

Bügen Äfğanstannıñ Herat şähärenä kilgän Berläşkän Millätlär Oyışması diplomatları köndäş etnik törkemnärne bäreleşlärne tuqtatırğa çaqırdı. Delegatsiägä Quşma Ştatlar, Britaniä, Fransiä, Germaniä, İspaniä häm Bolğarstannıñ Berläşkän Millätlärdäge wäkilläre kergän. Xalıqara diplomatlar yulnı tönyaqtağı Mazar-i-Şarifkä däwam itäçäk. Avgust ayınnan birle Äfğanstandağı bäreleşlärdä 350dän artıq keşe hälak buldı. Alar arasında tınıç xalıq, ğaskärlär häm politsiä, yardäm oyışmaları wäkilläre, amerikan xärbiläre häm Al-Qaida suğışçıları bar.

XS
SM
MD
LG