F.Şalyapin isemendäge XXIII Xalıqara opera festivale Qazanda 6nçı fevral'dän – 15nçe fevral'gä qädär uzaçaq. Bu festival'ne uzdıru TR mädäniät ministrlığınıñ eş planına da kergän. Bıyılğı festival'gä tuğız çit ildän 57 opera artistı kiläçäk ikän. Traditsiä buyınça festival'ne “Boris Godunov” operası açaçaq. Festival' 10 kön buyı baraçaq. Festival' barışında DJ. Puççininıñ “Toska” operası kürsäteläçäk. Bu operağa Tatarstannnıñ xalıq artistı Renat Salavatov dirijerlıq itäçäk. Tamaşaçılar tağın D. Verdinıñ “Aida”sı, häm soñğı waqıtta teatrda quyılğan ike premyera: “Ence ezläwçelär”kompozitor J.Bize häm D.Verdinıñ “Nabukko” operaların tıñlıy alaçaq.
Ä ul arada Qamal teatrı artistları Tatarstan buylap gastrol'lärgä çığıp kitäçäk. Ä şuşı Şalyapin festivale uzğan waqıtta Qamal teatrı üzeneñ tatar dramaturgiäsen yaratqan tamaşaçıların yuğaltmasmı soñ digän soraw belän teatrnıñ citäkçese Şamil Zakirovqa soraw birdek. Monıñ turında ul menä närsälär söyli:
“Soñğı 10 yılda bez fevral' yäki aprel' aylarında gastrol'lärgä çığıp kitäbez. Bıyıl Şalyapin isemendäge festival' buş binağa kilep kerä. Çallı, Älmät, Tübän Qama şähärlärendä inde bez 30 yıl buyı spektakl'lärebezne kürsätäbez. Bezneñ üzebezneñ zäwıqlı tamaşaçıbız bar. Tamaşaçını tärbiäläwdä Marsel' Sälimcanov ta bik küp köçen saldı. Bez bu şähärlärne bik yaratabız.
Häm bez anda bıyıl üzebezneñ 5 premyera spektakl'lärebezne alıp barabız: Tufan Miñnullinnıñ “Şulay buldı şul”,Kärim Tinçurinnıñ “Qazan sölgese”, Georgi Xugayıvnıñ “Qara çikmän” myuziklı, Rabit Batullanıñ “Kiçer mine änkäy” spektakle, Zölfät Xäkimneñ “Yawa qarlar, yawa qarlar” muzıykal' spektakl'lären alıp barabız.”,- dide Şamil Zakirov
Äye, işetüegezçä , 5nçe fevraldän Qamal teatrı artistları Tatarstan buylap 10 könlek gastrol'lärgä kitälär. Ä Şalyapin festivaleneñ gala- konsertı S. Säydäşev isemendäge Zur konsert zalında ike kön baraçaq. 14nçe fevral'dä , häm – şul uq konsertnı tamaşaçılar 15nçe fevral'dä tıñlıy alalar.
Azatlıq radiosı Mälikä Basıyr ,Qazan.
