NATO general sekratare Jaap de Hoop Scheffer, Azerbaycanğa yasağan säfäre waqıtında bügen, Azerbaycannı Ärmänstan belän mönäsäbätlärdä yaña çor başlarğa çaqırdı. Azerbaycan belän Ärmanstan arasında suğış Sovetlar Berlege tarqalğannan soñ 1990nçı yıllar başında buldı. Ul çaqta nizaq uçağı – ärmännärneñ azerbaycan cirendäge Tawlı Qarabax töbäge ide.
Atışlarnı tuqtatu turında kileşü 1994nçe yılda imzalandı, ämma tınıçlıq turında kileşü äle qabul itelmägän, häm şuña ike kürşe formal räweştä suğış xälätendä qala. De Hoop Scheffer süzlärenä qarağanda, NATO Tawlı Qarabax nizağın çişügä ber niçek tä qatnaşa almıy: "NATO qatnaşa almıy häm qatnaşmayaçaq. NATO berektäşläre älbättä Azerbaycannıñ territorial bötenlegen xörmät itä. Ämma nizaqnı çişü belän Minski törkeme, alarnıñ räistäşläre häm Yevropada İminlek häm Xezmättäşlek Oyışması şöğellänä, NATO monda turıdan turı bernindi dä rol uynamıy" dide saqlanu berlegeneñ general sekretare. Baqığa Jaap de Hoop Scheffer Gruziädän kilde, üz säfären ul Ärmänstanğa däwam itäçäk.
