Accessibility links

якшәмбе, 11 декабрь 2016, Казан вакыты 16:44

Kiñäşmä Şurası yomğaq yasadı


Sverdlov ölkäse gubernatorı qarşında eşläp kilgän milli eşlär buyınça konsul''tativ sovet utırışında küptän tügel ütkän 2004 yıl näticälärenä yomğaq yasaldı häm yaña başlanğan yılğa eş yunäleşläre bilgelände. Konsul''tativ sovet sekretare Marina xanım Plyasunova üzeneñ çığışında assızıqlap ütkänçä, 2004nçe yıl Sverdlov ölkäsendä millätara mönäsäbätlär yağınnan totrıqlı, tınıç yıl bulıp isäplände. Milli oyışmalarnıñ bu eştä role bik zur. Küpmillätle Sverdlov ölkäse xalqınıñ milli tormışı bik canlı bardı.

Marina Yur''yevna äytüençä, gubernator xakimiäte uzğan yılnı milli tormışnı canlandıruğa yünältelgän küp kenä eşlär başlap cibärde. Äytik, Sverdlov ölkäse mäğärif ministrlıysında milli mäğärif öçen cawap birä torğan maxsus bülek buldırıldı. Ägär dä yıl buyına ber genä milli klass ta açıla almağan ikän, bu inde milli oyışmalarnıñ andıy klasslarda uqırlıq balalar cıya almawı arqasında buldı.

Milli massaküläm mäğlümat çaralarına kilgändä, barlıq millätlärgä dä buşlay efir waqıtı birep, milli tapşırular yasaw çığımnarın qaplıy alu mömkinlege bulmağanlıqtan, bar ixtıäclarnı da qänäğätländerä alırlıq urtaq millätara tapşıru buldıru turında qarar qabul itelde. Ölkä byudjetınnan bu eşkä xätta berniqädär aqça da bülep birelde. Millätara tapşıru yasawnı ölkä televideniese kanalı üz östenä alırğa buldı.

Quanıçqa qarşı, soñğı aylarda başqa televizion kanallarda da törle millätlärneñ milli tormışın yaqtırta torğan tapşırular barlıqqa kilä başladı. Bar keşegä dä añlayışlı bulırlıq itep rus telendä çığarıluçı älege tapşırular milli bäyrämnärne, ğöref-ğadätlärne çağıldıruçı waqiğalarnı kürsätep kenä qalmıylar, ayırım ğailälärdä bulıp, törle yäşäyeş problemaların da yaqtırtalar. Bu bigräk tä elekkege Sovetlar Soyuzı respublikalarınnan küçep qaytuçılar, grajdanlıq mä’säläläre. Keşelekle, cılı ruxta yasaluçı bu tapşırular qayberäwlär bik kisken qarağan problemalarnı ikençe yaqtan kürsätä, millätara duslıqnı nığıtırğa yärdäm itä. Yaña yılda da andıy tapşırular däwam itär dip ışanası kilä.

Konsul''tativ sovet utırışında milli oyışmalarnıñ eşenä yomğaq yasaldı. Yekaterinburg şähärendä eşläp kilüçe Milli Media-Xolding citäkçelärenä 2004 yılğı eş yomğaqları buyınça Sverdlov ölkäse gubernatorınıñ räxmät xatı tapşırıldı.

Sverdlov ölkäse Wäkillär palatasınıñ Zakonnar cıyılışı deputatı, Milli Media-Xoldingnı ğämälgä quyuçılarnıñ berse Al''bert Abzalov küptän tügel ölkäneñ könbatış okrugında urnaşqan balalar yortlarında bulıp qayttı. Krasnoufim, Äçit, Ärtä, Tübän Sırğa rayonnarında urnaşqan balalar yortlarında tärbiälänüçe yätimnär belän oçraşuğa, ul, bilgele inde, buş qul belän barmadı. Yaña yıl küçtänäçläre itep ciläk-cimeş, täm-tomnar belän bergä, Al''bert äfände sabıylarğa cılı kiemnär häm kiez iteklär öläşte.

Ul citäklägän “Keçe watanım” isemle xäyriä fondı bu eş belän inde menä dürtençe yıl rättän şöğellänä. Bu yulı da, ğädättägeçä, Al''bert Abzalov urındağı citäkçelärdän xällären beleşte, balalar yortlarınıñ kiräk-yaraqları turında soraştı. Krasnoufim häm Äçit balalar yortlarına komp''yuter, başqalarına sport kiräk-yaraqları belän yärdäm itärgä wäğdä birde.

Bu könnärdä Yuğarı Pışma şähärendä qoymalarda, bağanalarda, xätta internet çeltäre buyınça cibärelgän elektron xatlarda “Qäderle yaqtaşlar! Aq balalarıbıznı qara kilmeşäklärdän saqlar öçen qaralarnı ildän quıp çığarıym!” digän mäğnädäräk öndäwlär yabıştırılğanı bilgele buldı. Kavkazdan kilep biredä eşläwçelärgä qarşı yunältelgän bu öndäwlärne taratuçılar turında 16-18 yäşlek, üzlären “skinexidlar” dip atawçı yäşüsmerlär digän fiker bar. Tärtip saqlaw orğannarı alarnı ezläw belän şöğellänä.

Fäwiä Safiullina, Yekaterinburg

XS
SM
MD
LG