Accessibility links

пәнҗешәмбе, 8 декабрь 2016, Казан вакыты 01:21

Yekaterinburgta tatar ädäbiäte seminarı uzdı


Bu könnärdä Yekaterinburg şähärendä tatar tele häm ädäbiäte uqıtuçıları öçen “Tatar ädäbiäte däreslären uqıtuda yaña texnologiä qullanu” digän temağa seminar bulıp uzdı. Sverdlov ölkä mäğärif üsterü institutı citäkçeläre çaqıruı buyınça, älege seminarnı uzdırırğa dip Qazan däwlät universitetınıñ filologiä fakul'tetı tatar ädäbiäte kafedrası mödire, filologik fännär doktorı, professor, akademik Xatıyp Yosıf ulı Minigulov kilgän ide.

Seminarğa Sverdlov ölkäseneñ törle poçmaqlarınnan, başlıça tatar awıllarınnan yegerme biş uqıtuçı cıyıldı. Äytergä kiräk, Xatıyp äfände leksiälärne yotlığıp tıñlarlıq bik qızıqlı, mawıqtırğıç itep alıp bardı. Tıñlawçılar öçen tatar ädäbiäteneñ üseş tarixı ğına tügel, ä bälki Qıtay, Hindstan, Finlyandiä, Germaniä häm başqa çit illärdä tatar ädäbiäteneñ bügenge köndäge xäle, şärıq ädäbiäteneñ bötendönya ädäbiät üseşenä yoğıntısı kebek bik qızıqlı yaña mäğlümatlar bilgele buldı.

Tatar teleneñ qolaqlarnı irkälärdäy cırday matur moñlı ahäñen tıñlawçılarğa işetterä alırlıq tatarlar siräk oçrıy. Xatıyp ağanıñ söyläwen uqıtuçılar näq menä şundıy bulğanı öçen bik yaratıp qabul ittelär. Däreslärgä çın küñeldän, yaratıp yördelär. Ğalimneñ üzeneñ dä tatar tele uqıtuçıları turındağı fikere bik yuğarı. Anıñ äytüençä, ägär dä töbäklärdä tatar saqlanıp qalğan ikän, monıñ belän bez iñ berençe fidaqär canlı tatar tele uqıtuçılarına burıçlı.

Sverdlov ölkäse regional' mäğärif üsterü institutı metodistı Zäytünä Şäymöxämmätova äytüençä, ölkädä eşläwçe tatar tele uqıtuçılarınıñ belemen kamilläşterü ayırım ber sistemağa salınıp däwam itä. Uzğan yıl uqıtuçılarnıñ barısı da ike yıllıq kurslar tämamlap, ikençe yuğarı belem alu turında tanıqlıq alğannar ide. Zäytünä xanım fikerençä, şundıy tiz arada alğan belemnärne tiränäytep, kamilläşterep toru bik möhim. Şuña kürä regional' mäğärif üsterü institutı bu yıl tatar tele uqıtuçıları öçen öç seminar äzerlägän. Ul seminarlar Tatarstan respublikası mäğärif ministrlığı yärdämendä, Tatarstannan çaqırtılğan kürenekle tel ğalimnäre belän berlektä uzdırılaçaq.

Fäwiä Safiullina, Yekaterinburg

XS
SM
MD
LG