Accessibility links

сишәмбе, 6 декабрь 2016, Казан вакыты 06:07

Başqortstan Mostay Kärim Belän Xuşlaştı


Comğa könne Başqortstan cämäğätçelege xalıq şağire, küp kenä yuğarı büläklär häm maqtawlı isemnär iäse Mostay Kärim belän xuşlaştı. Kürenekle yazuçı 21 sentäbergä qarşı töndä Ufa xastaxanäläreneñ bersendä yöräk öyänägennän wafat bulğan ide.

Comğa könne başqort ädäbiäte üseşenä zur öleş kertkän talantlı şäxes belän xuşlaşu Ufanıñ Neft''çelär mädäniät sarayında irtänge säğät unda uq başlanıp kitte. Şul waqıtta uq älege mädäniät sarayı urnaşqan Lenin uramı xalıq belän tulğan ide inde. Meñnärçä keşe xalıq şağire belän xuşlaşırğa tuqtawsız ağıldı. Moñarçı Başqortstanda kemne dä bulsa cirlägändä bu qädär xalıqnıñ cıyılğanı bulmağandır da möğayın. Respublika rayonnarınnan, şähärlärennän avtobuslarda şulay uq meñnärçä keşe kilde. Rusiäneñ küp kenä töbäklärennän dä, qayber elekke Sovetlar berlege respublikalarınnan da baytaq keşe kilgän. Tatarstannan Däwlät Sovetı räise Färit Möxämmätşin citäkçelegendäge wäkillek tä, qayğı urtaqlaşu öçen Ufağa kilde. Tatarstan Yazuçılar berlege räise Mirza İbrahimov, şağirlär Rinat Xarisov, Robert Miñnullin häm başqa tanılğan şäxeslär Qazannan kilep citte yaratqan yazuçıbıznı soñğı yulğa ozatuğa. Mäskäwdän tanılğan cırçı İosif Kobzon häm başqa kürenekle sänğät ähelläre, yazuçılar da kilgän.

Neftçelär mädäniät sarayında kön üzägendä, säğät unikedä matäm mitingısı başlandı. Şuşı tirädäge böten uramnar xalıq belän tulğan ide. Matäm mitingısın Başqortstan Respublikası Däwlät Cıyılışı räise Konstantin Tolkaçev açtı häm alıp bardı. Üzeneñ çığışında ul Mostay Kärimneñ icatına häm şäxesenä yuğarı bäya birep, anı başqort xalqınıñ böyek ulı dip atadı. Anıñ iseme tarix bitlärendä mäñgegä qalaçağın assızıqladı Konstantin Tolkaçev.

Tatarstan xalqı isemennän mitingta Tatarstan Däwlät Sovetı räise Färit Möxämmätşin çığış yasadı. Üzeneñ xisle çığışında Färit Möxämmätşin Mostay Kärimne başqort xalqınıñ ğına tügel, ä tatar xalqınıñ da, ğomumän, barlıq törki xalıqlarnıñ da urtaq talant iäse, dip bäyäläde. “Mostay Kärim Başqortstannıñ ğına tügel, ä bar keşelek dönyasınıñ kürenekle şäxese, icatınıñ bäyäse berqayçan da töşmäyäçäk olı talant iäse”, - dip äytte Färit Möxämmätşin.

Artaban süz Başqortstan Yazuçılar berlege räise Rawil Bikbaevqa birelde. Menä anıñ çığışınnan ber özek: (audio)

Xalıq şağire Mostay Kärimneñ wafatı uñayınnan qayğı urtaqlaşu süzläre belän respublikadağı başqa kürenekle şäxeslär, yazuçılar, artistlar, däwlät häm cämäğät eşlekleläre, şulay uq märxümneñ ulı, yazuçı häm tärcemäçe İlgiz Kärimov ta çığış yasadı. Mostay Kärimneñ wafatı uñayınnan dönyanıñ törle poçmaqlarınnan yözlärçä qayğı urtaqlaşu telegrammaları kilde. Rusiä prezidentı Vladimir Putin, premyer-ministr Mixail Fradkov, Tatarstan prezidentı Mintimer Şäymiev häm başqa kiñ bilgele däwlät citäkçeläre, ataqlı şäxeslär märxümneñ tuğannarınıñ häm yaqınnarınıñ qayğısın urtaqlaşıp telegrammalar cibärgän. Şularnıñ qayberläre matäm märäsimendä uqıp işetterelde.

Ber säğättän artıq barğan miting tämamlanğaç, matäm kolonnası möselman ziratına qarap yul aldı. Törle oyışmalardan, ayırım keşelärdän kiterelgän çäçäklärne genä dä ziratqa distälärçä yök maşinası alıp bardı. Ziratqa barırğa telägän xalıqnı maxsus äzerlängän avtobuslarda alıp bardılar. Möselman ziratında Mostay Kärim ruxına bağışlap din ähelläre yasin çıqtı häm tieşle başqa ğibädätlärne başqardı. Kürenekle şağirne mäñgelek yortına öç yıl elek wafat bulğan cämäğäte Rauza xanım yänäşäsendä küçerdelär. Mostay Kärimneñ şäxese turında kiläçäktä äle maqtaw süzläre bik küp bulır. Aña bağışlap kitaplar yazılır, fil''mnar töşereler, kartinalar yazılır. Zur şäxes, küpqırlı talant iäse Mostay Kärimneñ icatı da kiläçäktäge küp buınnar öçen ruxi teräk, süz sänğätenä öyränü öçen ber bay miras bulır, digän fikerlär oluğ talant iäse belän xuşlaşqanda yış yañğıradı.

Fänis Fätxi, Ufa

XS
SM
MD
LG