İldä nilär bulıp yata? - 8.IV.2008

►Tatarstan citäkçelege Singapurda uqıyaçaq

Singapur xaritäse

Bilgele bulğança 31 marttan 2 äprelgä qädär Singapurda 3 nçe Rusiä - Singapur iqtisadıy forumı uzdı. Älege çara qısalarında respublikanıñ iqtisad ministrı Marat Safiullin Singapurnıñ säwdä häm sänäğät ministrı Li Yi Şyen belän oçraştı.

Sişämbe, Tatarstan xökümätendä Marat Safiullin älege oçraşunıñ näticäläre belän tanıştırdı.

Monnan tış oçraşu barışında Tatarstanda investisialär buyınça agenstvo tözü turında söyläşülär barğan. Ministr süzlärençä Singapurnıñ International enterprises Singapore oyışması respublikada mondıy idarä tözergä yärdäm itäçäk. Älege oyışma Singapurnıñ säwdä häm sänäğät pulatı rolen üt. Bügenge köndä ul yaqınça 35 il belän tışqı iqtisadıy elemtälär urnaştırğan.



--------------------------------------------------------------------------------------------

►Qazan Rusiäne tolerant il itep kürsätmäkçe

Yewropa Şurası töbäk häm cirle xakimiatläre Kongressınıñ ber komitetı çirattağı utırışın Qazanda ütkärde.

Tatarstan başqalasına älege Kongressnıñ mädäniät häm mäğärif komitetı wäkilläre kilde. Tatarstan parlamentı räise Färit Möxämmätşin, şuşı komitetta da, citäkçelärneñ berse bulıp tora. Qunaqlar, anıñ çaqıruı belän kilde.

Şuşı Yewropa Şurası (YŞ) Kongressı komitetı utırışında qatnaşu öçen Tatarstanğa Austria, Belgia, Şvesaria, Polşa, İtalia, Fransia häm Germaniadän cawaplı wäkillär kilde. Alar arasında Ukraina häm Rusiä töbäklärennän dä komitet äğzaläre bar. Yewropada mädäniätlärneñ üz ara aralaşuı, ber-bersen xörmät itü, ber millätneñ telen häm mirasın başqasınnan östen quymaw kiräklege xaqında söyläşü alman, fransuz, rus tellärendä bardı. Här wäkilneñ tuğan telendäge çığışı, başqa 4-5 telgä tärcemä itelep bardı.

Ğädättä, tolerantlıq ürnäge bulıp atalğan Tatarstanda, törle millät wäkilläre qatnaşqan cıyılışlar, ber genä teldä, rusça ğına bara.
Älege cıyında qatnaşuçılar häm başqa qunaqlar, çärşämbe könne Qazanda cirle häm Yewropa universitetlarına bağışlanğan konferensiagä cıyılaçaq.

Yewropa Şurasınıñ älege Kongressı Rusiäneñ başqa töbäklärendä dä üzeneñ küçmä utırışların ütkärgän bulğan.

--------------------------------------------------------------------------------------------

►Qazanda mädäniät qaynaşuı

Kamal teatrında ataqlı satirik akter Rawil Şäräfievneñ 70 yäşlek yübileyenä bağışlanğan kiçä, Säydäş mädäni üzägendä illähiät kiçäse ütte.

Azatlıq radiosınıñ düşämbe tapşırularında mädäni yañalıqlarnıñ küp buluı tabiğıy. Çönki şimbä-yäkşämbe könnärendä Qazanda ütkän icadi kiçälär, ictimağıy cıyılışlar, konsert-spektakllär san yağınnan da, aktuallek häm sıyfat yağınnan da ayırılıp tora. Şimbä kiçendä Kamal teatrında ataqlı satirik akter Rawil Şäräfievneñ 70 yäşlek yübileyenä bağışlanğan kiçä milli cämäğätçelekkä zur täesir yasadı. Säydäş mädäni üzägendä illähiät kiçäse ütte.

Universitetnıñ tamaşa zalında xäzerge estradanı yaratuçılar ber köndä ike zur konsert qaradılar.

Läylä Däwlätova konsertı Xäniä, Xämdünä, Fidan, Aydar häm yaña qabınğan yäş yoldızlar nurında kümelgän ide. Tatarstan, Başqortostannıñ, tatar häm başqortnıñ urtaq bäyrämenä äylände Aqtanış qızı, yäş şağıyrä Läylä Däwlätovanıñ konsertı.

--------------------------------------------------------------------------------------------

►Kauçukçılarnıñ ağulı hawasın 3 meñnän artıq keşe sulıy

Xalıq ta üzeneñ kiläçäge häm sälamätlege öçen wayımsız, qullanu ölkäsendä küzätü oyışması, yäğni Rospotrebnadzor da citärlek eşlämi, sänäğät oyışmaları da qanun boza.

Rusiä qalalarındağı äylänä-tirä moxitnıñ nindi xäldä ikänlege belän qızıqsına başlasañ, änä şundıy näticägä kilergä mömkin.

Yaqın-tirädägelärgä zıyanlı parlar taratuçı Qazandağı 15 yağulıq salu noqtası xucaları bügenge köndä niçek itep kenä bulsa da sanitar saqlanu aralığın kiñäytü turında baş wata. Qanunğa kürä, bu aralıq iñ kimendä 50 metr bulırğa tieş. Anda benzin parları tirä-yündägelärgä zıyan salmasın öçen ağaçlar üsü, yäşellek görläp toru mäcbüri. Qazan häm rayonara tabiğätne saqlaw prokuraturası alğa taba da qanun bozuçı mondıy noqtalarnı açıqlawnı däwam itergä isäpli.

Biektaw awılınıñ sanitar tabibı üz beldege belän, tikşerülär ütkärep tormıy ğına, tirä-yüngä ağulı matdälär taratuçı şirkätneñ zıyannan saqlaw aralığın raslağan. Ä prokuratura bu doqumentta qanun bozılunı kürep anı kire qaqqan. Bügenge köndä äylänä-tiräneñ ni däräcädä pıçranğanın sınaw öçen hawa alınıp tikşerü ütkärelä. Ul ber yıl däwam itäçäk.

--------------------------------------------------------------------------------------------

►«Tatarstan poçtası» öçen köräştä Mäskäw ciñde

Berniçä yıl mäxkämä eşe alıp barıp ta respublika citäkçelege “Tatarstan poçtasın” “Rusiä poçtası” federal däwlät idaräsennän saqlap qala almadı.

«Kommersant» gazetası yazuınça, uzğan comğada, Rusiäneñ mäğlümatlaştıru häm elemtä ministrı Leonid Reyman, prezident Mintimer Şäymiev belän “Tatarstan poçtasın” “Rusiä poçtası”na quşu buyınça söyläşülär alıp barğan. Näticädä alar “Tatarstan poçtasın” federal' idarä qaramağına küçerergä digän qararğa kilgän.

İskä töşerik 2002 yılda küp kenä töbäk poçtaları ber federal' idarägä berläşkäç, Tatarstan citäkçelege moña qarşılıq belderep çıqqan ide. 2006 yılda Rusiäneñ yuğarı arbitraj mäxkämäse “Tatarstan poçtasın” federal idarä qaramağına küçergä digän qarar çığarğan ide. Ämma Tatarstan citäkçelege moña riza bulmıyça respublika arbitraj mäxkämäsenä şikäyät beldergän. 2008 yıl febrälendä ul “Tatarstan poçtasın” “Rusiä poçtasına” quşmasqa kiräk digän qararğa kilä, ämma Rusiä citäkçelege monı tanımıy.

--------------------------------------------------------------------------------------------