Accessibility links

İldä nilär bulıp yata? - 14.V.2008


►Qazan 2013 yılğı Universiadağa 70% äzer ►Mäğäriftä milli, dini "genotsid" barmı? ►Benzin bäyäse yänä kütärelde ►Kürgäzmälär zalı satılırmı? ►Xoquq yaqlawçılar Qazan türälären Amurğa cibärü yaqlı

--------------------------------------------------------------------------------------------

►Qazan 2013 yılğı Universiadağa 70% äzer

Ä 2013 yılğı Universiadanı ütkärü xoquqı Qazanğa elägerme yuqmı, yaqın könnärdä xäl itelergä tieş. Tawış birü 31nçe mayda bulaçaq. Ä añarçı Qazanda FISU, Universiadanı ütkärü mäsäläsen xäl itüçe federasia wäkilläreneñ kilüen kötälär.

Qazanda Universiada yarışların ütkärer öçen kiräkle sport qorılmalarınıñ 70% äzer inde. Bu xaqta sport öçen cawaplı çinovniklar belderä. Bu könnärdä sport ministrı Marat Bariev Universiadanıñ budjetı turındağı mäğlümatlarnı açıp saldı.

2013 yılğı böten dönya studentlar sport uyınnarın oyıştıru 604 million euroğa töşärgä mömkin, dide ministr Marat Bariev.

Universiada Qazannıñ uramnarınıñ, hawa alanı häm stadionnarı tözekländerelüe belän bergä, qayber Qazan keşelären yaña toraqlı itärgä mömkin. 2011nı yılğı Universiadağa däğwa itkändä, Qazan yanında awıllarda yäşäwçelär şähär xakimiatlärennän yaña toraq ömet itte.
Çönki alarnıñ yortları Universiada qorılmaları tözeläçäk urınnarğa turı kilgän ide. Xäzer dä alar Qazannıñ Universiada öçen köräştä ciñüenä bik ömetlänä.

--------------------------------------------------------------------------------------------

►Mäğäriftä milli, dini "genotsid" barmı?

Bu könnärdä Qazandağı tatar-törek litseyları yazmışına açıqlıq kertü maqsatınnan Tatarstan mäğärif ministrlığında maxsus cıyılış uzar, dip kötelgän. Tik ul uzmadı, saqlap qalu öçen maxsus räsmi mäğärif säyäsäte alıp barılmıy, dip borçıla milli zıyalılar. Qazannıñ “iñ tirän belemle”, tärtiple balalar tärbiäli torğan, yuğarı reytinglı sanaluçı uqu yortların inde Rusiä prokuraturası wäkilläre berniçä yıl tikşerep tora. Litseylarnı yabalar ikän, digän şaw-şu qubıp tora. Äytik 31 may könne belem birüçe törek uqıtuçıları kitärgä tieş, dip xäbär itelgän.


Törek uqıtuçıların yaqlap uzğan ayda Qazanda tatar ictimağıy üzäge uram cıyını da yasadı. Anı Yunıs Kamaletdinov oyıştırğan ide. Räşit Yäğfärov tarafdarları da uramğa çığarğa cıyına ikän. Bu atnada Qazanda tatar yäşläre dä bu nisbättän miting yasarğa teli. Alar fikeren iskärtep milli fiker iäse ğälim Damir İsxaqov “Azatlıq” radiosına, Rusiä köçlärenä tatar-törek litseyların yabarğa digän burıç quyılğan, digän ide.

--------------------------------------------------------------------------------------------

►Benzin bäyäse yänä kütärelde

Qazanda benzin bäyäse tağın 1 sumğa arttı. Xäzer iñ küp soralğan 92 marqalı benzin 22,5 sum tora. Belgeçlär fikerençä, soñğı 4 ayda bu yağulıqqa bäyä yaqınça 4 %qa kütärelgän.

Soñğı arada, benzinğa bäyä kütärelü, kübesençä Amerika dollarınıñ krizis kiçerüe belän dä bäyle bulırğa mömkin. Elegräk Amerika şirkätläre üz aqçaların küçemsez milek bularaq saqlasa, soñğı arada neft häm altınğa investisiali, şuña kürä neft bäyäse üsä.

--------------------------------------------------------------------------------------------

►Kürgäzmälär zalı satılırmı?

Rässamnar berlegeneñ yaña räise Zöfär Ğıymayıv ta bu binanı rässamnarnıqı itep saqlap qalu öçen quldan kilgänneñ barsı da eşlänäçäk dip beldergän ide.

Döres, Kürgäzmälär zalı älegä satılmağan. Ämma, Samardağı İdel buyı arbitraj mäxkämä qararına küz salsañ, bu binağa “Enerğobank”nıñ böten xoquqı bar. Bu bank anı sattırırğa häm burıçqa birelgän aqçaların kire qaytarırğa teli. Şulay uq Samar mäxkämäse Tatarstan rässamnar berlege ictimağıy berläşmäseneñ kommersiasez oyışma Sänğät fondın bölgän bularaq ta tanığan. Fondnıñ xäzerge waqıtta mödire wazifaların başqaruçı Olğä Lopatkina äytüençä, bu binalarnı däwlätneke itep tanıp, saqlap qalu öçen ber teräk qalğan. Ul da bulsa, 10 yüngä bilgelängän Tatarstan arbitraj mäxkämäse. Bügenge köndä sänğät fondı da, mädäniät ministrlığı da, cir häm milek mönäsäbätläre ministrlığı da, xökümätneñ xoquq idaräse dä köne-säğäte belän bu çaranı kötä. Kiräkle doqumentlar äzerlänä. Xoquq idaräse bu binalar turındağı arxiv doqumentlarnı barlıy.

Tatarstan rässamnarı häm sänğät waqıfı citäkçeläre kürgäzmälär zalın sattıru qurqınıçı çigener dip ömetlänä. Tatarstan mädäniät ministrlığı, cir häm milek mönäsäbätläre ministrlığı bu binalarnı däwlätneke itü iñ döres yul bulaçaq dip sanıy.

--------------------------------------------------------------------------------------------

►Xoquq yaqlawçılar Qazan türälären Amurğa cibärü yaqlı

Qazanda “Cinayätçelek häm qanunsızlıqqa qarşı” Bötenrusiä ictimağıy oyışması üzençälekle aksia başladı. Alar Tatarstan çinovnikların Amurğa cibärü öçen aqça cıya häm şulay itep korrupsiagä qarşı köräşergä uylıy.

Soñğı aylarda Amur citäkçelegendä eşläwçe qazanlılarğa, ayırım alğanda Amur ğubernatorı Nikolay Kolesov, vitse-gubernator Güzäliä Minkina, Amurdağı ministrlar Andrey Belov, Ramil Turayıv, Sergey Osyaninğa qarata cinayät eşe quzğatıldı. Alar xezmät urınnarın üz faydasına qullanğan dip bilgelänä. Xoquq yaqlawçılar isä, bu çinovniklar Qazandağıça eşlägän, ämma Amurda bolay eşläw öçen alar cawaplılıqqa tartılğan, di. Şuña başqa türälärne dä Amurğa cibärergä kiräklegen äytälär häm “Cinayätçelek häm qanunsızlıqqa qarşı” Bötenrusiä ictimağıy oyışması, xoquq yaqlawçılar maxsus aksia başlanğan. Alar çinovniklarnı Amurğa cibärü öçen xalıqtan biletqa aqça cıya. Oyışma citäkçese Dmitriy Berdniqov Qazannan ayırmalı bularaq, Amurda korupsia belän köräşä belälär dip sanıy.

XS
SM
MD
LG