Accessibility links

Кайнар хәбәр

İldä nilär bulıp yata? - 10.VI.2008


►Rusiä könendä Tatarstanğa bäysezlek sorap ►Çallıda tatar restoranı açılaçaq ►Balalar kirmänne qoçağına aldı ►Prezidentlıq beterelmi. Älegä ►Qazan baykerları Universiada xäbären tarata ►İslam üseş banqı räise Äxmät Möxämmäd Ali

--------------------------------------------------------------------------------------------

►Rusiä könendä Tatarstanğa bäysezlek sorap

Marat Mölekov isemendäge Tatar ictimağıy üzäge uram cıyınına çığa.

“Qazannıñ Ğumilev häykäle yanında 12 yündä irtänge yaqta uzaçaq piketta Tatarstanğa bäysezlek, milli mänfäğätlärne qänäğätländerü taläpläre yazılğan şiğärlär kütärep toraçaqbız”,- dip belderä Tatar ictimağıy üzäge.

--------------------------------------------------------------------------------------------

►Çallıda tatar restoranı açılaçaq

“Qaymaq” restoranında tatarça qarşı aludan başlap, barısı da milli bulaçaq. Bu proekt östendä anıñ citäkçese yıl yarım eşlägän. Ul 3 könnän açıla.

Çallıda KamAZ tözeleşe barğan yıllarda “Tatar aşları yortı” açılğan ide. Monnan 3 yıl çaması elek, tatar iseme belän bäyle şuşı yort yabıldı. Näticädä, tatar rizıqların, aş-suların täqdim itüçe aşxanä, tatarça küñel açarlıq urın qalmadı.

Xäzer şähärneñ iñ uñay urınında “Qaymaq” dip atalğan tatar milli restoranı açılırğa tora . “Qaymaq” restoranı Çallı Sabantuyı könne, 14 yündä açılır dip kötelä. Tantanada şähär citäkçeläre belän bergä elekke Tatarstan ölkä komitetınıñ 1nçe sekretare Fikrät Tabeyev ta çaqırılğan.

--------------------------------------------------------------------------------------------

►Balalar kirmänne qoçağına aldı

Sişämbe könne Qazanda mäktäp yäşendäge balalar häm yäşüsmerlär öçen Qazan Kremle mäydanında törle çaralar uzdı.

Bu çaralar yärdämendä aksiane oyıştıruçılar yäş buında tarixi häm mädäni häykällärgä saqçıl qaraş tärbiäläp, tuğan cirlärenä qarata watanpärwärlek häm ğorurlıq xisen uyatmaqçı.

Bilgele bulğança, Qazan Kirmäne Rusiäneñ cide moğcizası isemlegenä namzät bulıp tora. Ul isemlek ilneñ cide iñ möhim dip sanalğan tarixi urınnarın bilgeläp, anı Rusiäneñ “Altın turistlıq marşrutına” kertäçäk. Bügenge köndä isä Qazan Kirmäne bu isemlekneñ alğı urınnarınıñ bersen alıp tora. Aksianeñ näticäse 7 yül könne bilgele bulaçaq.

Balalar öçen oyıştırılğan bu çaralarnı “Qazan Kirmänen qoçağıbızğa alıyq” digän aksia başlap cibärde. Monda meñgä yaqın Qazan balaları ber-berse belän qulğa-qul totınışıp Kirmänne çornap aldı. Şul räweşle balalar Kirmänne qoçaqlarına aldı.

Şunnan soñ isä “Qazan Kirmäne – Rusiäneñ cide moğcizalarınıñ berse” iseme astında intelektual uyın da ütte. Uyın barışında balalar Tatarstan häm Qazan tarİxı buyınça üzläreneñ belemnären kürsätte.

Soñınnan yäşüsmerlär icadi sälätlären aça aldı. Alar üzläre quldan yasağan suvenirlarnı täqdim itep, “Qazan Kirmäne – turistik obyekt” digän reklam roligı bäygesendä qatnaştı.

--------------------------------------------------------------------------------------------

►Prezidentlıq beterelmi. Älegä

Däwlät Şurası prezident institutı beterelmiaçäk disä dä, tatar ictimağıy üzägen bu tınıçlandırmıy. Çallıda üzäk äğzaları cıyıldı.

Äytkän süz - atqan uq, yarasın tözätep bulmıy dilär. Şuşı könnärdä Tatarstanda prezident institutın beterälär ikän digän xäbär dä yäşen tizlegendä taralıp küplärneñ telenä kerde. Respublikanıñ räsmi mäğlümat çaraları bu turıda läm mim, bötenläy dä berni bulmağan tösle. Barı tik “Veçernyäya Kazan” gazetası ğına İrek Mortazinnıñ “Gazeta” basmasında çıqqan bu yazmasın tulısınça bastırdı. Biredä şulay uq, Däwlät şurasınıñ bu xällärgä qarata kire qağu belderüe dä bar.


Äle genä prezident wazİfasına kereşkän Medvedev ta töple ayaqqa basmağan, şuña kürä küp kenä xalıqta näfrät uyata torğan bu adımğa barırğa ul äle äzer tügel. Şuña kürä, Rusiädä respublika prezidentların beterü ğälämäte bula ala, ämma ber - ike yıldan soñ ğına.

Miña qalsa, xäzer Tatarstanda Şäymievqa qarşı maxsus nindider ber butalçıq tudırmaqçı bulalar. Kolesov tiräsendäge xällär, Qämil İsxaqovnıñ köçe äzäyüe, Qazanda Radik Draqonnıñ totıluında min şunıñ belän bäyläp qarıy.

Rusiä citäkçelege berençe bulıp Şäymievne köçläp, üz rizalığın birderep, prezident urınınnan cibärergä uylıy, başqalar annan ürnäk alıp üz rizalıqları belän wazİfalarınnan kitäçäklär. Şul räweşle Rusiädä törle millätlärne totqınlıqta yäşätmäkçe bulalar, di alar. Moña qarşı torır öçen tatar cämäğätçelege tatarstanlılarğa häm respublikada yäşäwçe başqa millät keşelärenä uram cıyınnarın ütkärergä digän möräcäğät belän çıqtı.

Cıyınnarnıñ töp maqsatı – Tatarstan prezidentı üz wazİfasında saqlap qaldıru. Bu uñaydan tatar ictimağıy üzägendä maxsus komissia dä tözelgän. Anıñ räise itep Räfis Kaşapov saylanğan.

Marat Mölekov isemendäge Tatar ictimağıy üzäge Tatarstan prezidentı wazİfasın saqlap qalu maqsatınnan inde bu pänceşämbedä Qazan üzägendä uram cıyının ütkärmäkçe bula.

--------------------------------------------------------------------------------------------

►Qazan baykerları Universiada xäbären tarata


Alar ozaqlamıy Soçiğä yul tota. Yulda Qazannıñ Universiada şähäre ikäne turında da belderep baraçaqlar.

“Bez ğädäti keşelär tügel”,- di “Freemen mc” baykerlar klubı citäkçese Eduard Kutuyev. Şuña kürä, Kutuyev äytüenä kürä, Soçiğä taba yulğa çığunıñ tögäl könenä kilgändä, anı räsmi bilgeläp tä bulmıy.


Şähär başlığı İlsur Metşin imzalağan, qazanlılar yullamasında “Qazan üzendä Universiada ütkärü öçen ike yıl köräşte. Studentlarnıñ Olimpiä uyınnarın ütkärü teläge böten qazanlılarnı berläşterde. Şuña kürä, Tatarstan başqalasında yäşäwçelär sezneñ şatlıqnı da urtaqlaştı. Olimpiä häm Universada uyınnarı bezneñ şähärlärgä üseş kiteräçäk” dielä.

İnvestor Tatarstanda rizıq citeşterer

--------------------------------------------------------------------------------------------

►İslam üseş banqı räise Äxmät Möxämmäd Ali

Azıq-tölek bäyäce artıp açlıq yanağanda, möselman türälär yañğırlı-qoyaşlı Tatarstanda azıq-tölek üsterergä ömetlänä.

Qazanda xalıqara investisialär konferensiase eşli başladı. Bu çara İslam üseş banqı belän bergälektä ütkärelä. Bu Bank mondıy zur çaranı İslam illäre konferensiase oyışmasına kermägän ildä berençe tapqır ütkärä.

Konferensiagä farsı qultığı, Yaqın Könçığış illäre, İslam illäre konferensiase oyışmasına kergän illärdän finans oyışmaları citäkçeläre kilgän.


Ni öçen mondıy märtäbäle çara Qazanda uza? Tatarstan iqtisad ministrı Marat Safİullin: «Tatarstan bankçılıqta, eşmäkärlek, sänäğät ölkäsendä dä yuğarı kürsätkeçlär birä. Bezdä sänäğät üseşe cide prosent. Bu yuğarı kürsätkeç. Şulay uq alar bezdä ruxi teläktäşlek tä kürä”, dide ul. Tatarstan qunaqlarnıñ iğtibarın innovasiale infrastruktura tözeleşenä, Tatarstanda eşläwçe texnoparklar çeltärenä, «Alabuğa» maxsum iqtisadi zonasına yünälttelär. Alar investisia kötälär.

Tik Tatarstanğa ekzotik may ğın tügel, ä söt, boday, it tä çittän küpläp kilä. Şulay bulğaç dögesez qalğan illär, bezdän alırmı ul azıq-tölekne, ällä tağın da arzanraqqa citeşterüçe Çuwaşstannanmı? Şulay da alar Tatarstan tabiğäten it yäki boday üsterü öçen bik qulay urın dip sanıy.

XS
SM
MD
LG