Accessibility links

Mäskäwdä dä törek mäktäplären yaqlıylar


Rusiä başqalasındağı tatar milli xäräkäte wäkilläre baş prokuratura binası qarşında piket ütkärde.

Bu yulı Watan milli-demokratik partiäse wäkilläre uramğa Qazandağı törek-tatar mäktäplären yaqlap çıqtı.

Mäğlüm ki, Rusiä prokuraturası inde şaqtıy waqıt alar eşçänlegendä törle citeşsezleklärne tabarğa tırışıp qarağannan soñ, älege mäktäplärdä uqıtuçı törek watandaşlarınıñ Rusiädän, dimäk Tatarstannan da kitüen taläp itte.

Watan partiäse piketında qatnaşuçılar Rusiäneñ mäğärif sistemasında häm ğomumän milli säyäsätendä barğan täräqqiätkä bik borçıluın belderde. Tatarstandağı tatar-törek mäktäpläreneñ eşe bar Rusiä belän çağıştırğanda da iñ yuğarı belem standartlarına turı kilä, alarnı yabarğa tırışu omtılışları isä Rusiä mäğärif ministrlığınıñ uqıtudağı milli komponentnı beterü yünäleşendäge ğämälläre rätendä tora, di piketta qatnaşuçılar.

Federal üzäkneñ şuşı ğämällären Watan partiäse Rusiädä barı tik ber genä millät, ber genä din qaldıruğa yünälderelgän dip sanıy.

Rusiä prokuraturasınıñ tatar-törek mäktäplären yabarğa tırışuına qarşı protestqa çığıp "bez üz mänfäğätlärebezne, balalarıbıznıñ kiläçägen yaqlıybız, mäğärif ölkäsendäge xoquqlarnı qısuğa qarşılığıbıznı belderäbez", dielä piketçılar möräcäğätendä.

Älege möräcäğätne alar Rusiä prezidentı Dmitri Medvedevkä dä yullağan.

Moña qädär Watan milli-demokratik partiäse Mäskäwdä Rusiä mäktäplärendä pravoslaw dine nigezlären uqıtuğa qarşı da ber uram cıyını ütkärgän ide.
XS
SM
MD
LG