Accessibility links

Кайнар хәбәр

Condoleezza Rice Tiflistä säfärdä


AQŞ däwlät sekretarı Condaleezza Rice bügen säfären Tiflistä däwam itä. Läkin Ricenıñ bu säfäre Gruziädä kiyerenkelekneñ artqan waqıtqa turı kilä.

Gruziäneñ Abxazia töbägendä kiçä 4 keşeneñ hälaq buluına kitergän bomba şartlawınnan soñ Rusiä – Abxazia – Rusiä bu eştä berbersen ğayepliy başladı.

Bügen Rice säfären irtä belän Sofiadan başladı. Ul anda Libyada qulğa alınıp sonınnan irekkä çığarılğan bolgar şäfqat totaşların ziärät itep, Bolgariäneñ NATOğa kerü teläktäşlegen yaqlap çığış yasadı.

Ricenıñ Sofiadan soñ ikençe tuqtalışı Tiflis buldı. Ul anda qarşılıqlı Abxazia töbägendä artqan kiyerenkelek mäsäläse xaqında räsmilär belän bergä söyläşer dip kötelä.

Gruziä tışqı eşlär ministrı Giga Bokeria Azatlıqqa oçraşudan elek, Abxaziadağı ğisyançılar nizağı söyläşülärneñ könüzäk teması bulaçaq dip beldergän ide:

“AQŞ bezneñ möhim xezmättäşebez. Däwlät sekretarı Condaleezza Rice ike il arasındağı mönäsäbätlärdä bik möhim şäxes. Bez älbättä bezneñ il mänfäğatlärenä qağılışlı mäsälälär turında söyläşäçäkbez. İke il arasında xezmätäşlekne arttıru yulların ezliyäçäkbez. Bolar belän bergä älbättä Abxaziadağı nizaq mäsäläsen dä söyläşerbez”

Abxazia soñgı waqıtta Gruziä belän Rusiä arasında qarşılıq tudıra. Bu xäl isä Tiflisne uñaysız xäldä qaldıra. Tiflis NATO kerer öçen başta töbäktä totrıqlıq urnaştırırğa tiyeş.

Mäskäw yağınıñ Tiflisne könbatış xärbi berlegennän çiktä totarğa teläwe isä ser tügel. Kiçä Azatlqınıñ Pragadağı baş fatirında yasağan çığışında Rice, NATOnıñ kiñäyüe Rusiä tarafınnan da ber kön qabul iteläçäk dide:

“Älbättä kiñäyü berektäş illärneñ rizalığı belän bula ämmä ul barı tik Rusiädän tormıy. Bez NATOnıñ Rusiägä qarşı bulmawın añlatırğa tırışabız. Bälki ul kiresençäder. NATO belän Rusiäneñ arası bik tatu, NATO-Russiä şurası bar. Häm şulay uq Rusiä cirlegendä demokratianıñ kiñäyü dä ziyan kitermäskä tiyeş.

Älbättä Ricenıñ Praga häm Tiflis säfäre Mäskäwneñ açuın çığara. Rice Praga säfärendä Rusiä qarşı çıqqan raketa qalqanıñ Çexiada urnaştıru öçen kiçä kileşügä qul quydı. Rice şulay uq säfäre waqıtında Rusiäneñ Abxaziädä nizaqlar çığaruın tänqitläp kilä.

Mäskäw bügen bu mäsälägä qarata yaña belderü yasap, Gruziäneñ mondıy xärkäte könyaq Kavkaz töbägendä xärbi qarşılıqqa kiterä alır dip kisätte. Rusiä şulay uq, provakasiä çığargan keşelärne yaqlap böten ğayepläwne Mäskäwgä belderergä tırışqan illärne dä tänqitläp çıqtı.


Rusiä sişämbe könne BMO aldında Gruzianı Abxazia häm Könyaq Osetiada artqan kiyerenkelekne beterergä çaqırdı. Älege töbäktä bu atna başında 4 Gruziä polisiäsenen qulğa alınuı belän töbäktä kiyerenkelek artqan ide.

Ricenıñ Gruziä säfäre şulay uq Abxaziada soñgı ber yarım yıl eçendä çıqqan zur nizaq waqıtına turı kilä. 6 yüldä ber kafeyda bulğan şartlawda 4 keşe hälaq bulğan ide. Waqıyğada Gruziä, Abxazia häm Rusiä şartlawda berbersenä ğayepläwlär taşlıy başladı.

Bu waqıyğadan soñ Abxazia berençe tapqır kileşüdän baş tarttı häm AQŞnıñ xalıqara tınıçlıq köçläreneñ nizaq cirlärenä kertü taqdimen kire qaqtı.
XS
SM
MD
LG