Кытай белән Төньяк Корея чиге арасындагы зур елга ташты

Кытайның Төньяк Корея чигендәге Ялу елгасы көчле яңгырлар сәбәпле ташты. Су ташу сәбәпле тирә яктагы 50 меңнән артык кеше иминрәк җирләргә күчерелде.

Кытай рәсмиләре су ташуның елганың икенче ягында калган Төньяк Кореяның Синуиҗу шәһәренә дә тәэсир итә алачагын, ләкин андагы вазгыять турында мәгълүмат булмавын белдерә.

Төньяк Кореяның дөнья белән сәүдә бәйләнеше Синуиҗу шәһәре аша булган өчен илнең бу төбәге зур әһәмияткә ия.