Мөселманнарны яклау җыены Чаллыда да узды

Якшәмбе Казанда үткән җыеннан соң дүшәмбе Чаллыда да каршылык чарасы узды. Пикетның башында ук югары дәрәҗәле полиция офицерлары халыкның таралуын таләп итте.

Башта ук шунысын билгеләп узарга кирәк, Кама аръягы шәһәр һәм районнарыннан әлеге пикетка килүчеләр саны күп түгел иде. Чаллы, Түбән Кама, Алабуга калаларыннан әлеге каршылык чарасында 70-80ләп кеше катнашты. ФСБ, МВД хезмәткәрләрен, журналистларны да кушып санаганда барлыгы 150ләп кеше дип әйтергә була.

Кичке сәгать алтыларда җыенга килгән халык шигарләрен күтәреп сафларга тезелде. Алар арасында 60-70 яшьлек әби-бабайлар да, 18-20 яшьлек мөслимәләр дә бар иде.

Әлеге урам чарасы Чаллы полициясендә ниндидер курку хисләре уятты. Полковник, подполковник, майор дәрәҗәсендәге полиция офицерлары җыенны оештыручылар булган Фәүзия Бәйрәмова, Рәфис Кашапов, Гамил Камалетдиновны даими әңгәмәгә чакырып тордылар, җыелган халыкның таралуын таләп иттеләр, пикетның рөхсәтсез, канунсыз булуын белдерделәр.

Оештыручылар үз чиратында пикет булачагы хакында хакимияткә тиешле вакытта искәртү булуын әйттеләр. Шуның белән пикетның канун нигезендә үтүен ассызыкладылар. Берара пикетчылар белән полиция арасы бик кызу дәрәҗәгә җитте. Ләкин Ф.Бәйрәмованың, Р.Кашаповның дәлилле аңлатмалар бирүе нәтиҗәсендә бу кызулык сүрелде. Бәхәстә алар җиңеп чыкты. Бу шәхесләр үзләре әйтүенчә, әлеге чараны оештыручыларга җәза булачак, аларны эзәрлекләячәкләр, эш мәхкәмәләргә кадәр барып җитәчәк.

Каршылык чарасында Наил Нәбиуллин җитәкчелегендәге “Азатлык” татар яшьләре берлеге әгъзалары дә зурлап катнашты. Түбән Камада кулга алынып иреккә чыккан Рәдиф Басыйров, Алабуга төрмәсендә 5 тәүлек утырып чыккан Фәрит Гатауллин да безгә үз фикерләрен җиткерде. Мәсәлән, Фәрит әфәнде белдерүенчә, кулга алынганнар да, аларның туганнары да хәзер курку хәлендә. Каршылык чараларында катнашудан куркалар. Шуңа, халыкның аз булуына гаҗәпләнмәскә кирәк, диде ул.

Пикетны оештыручылар һәм анда катнашучылар фикерләрен аудиоязмада тыңлый аласыз.