Русия Ислам Университетында мөселман мәдәнияте һәм һәвәскәр фильмнар төшерүче мөселман студентлар фестивале үтте. Ике өлешкә бүлеп уздырылган чараның беренче өлешендә РИУда укучы студентлар үз милләтләренең киемнәрен, милли ризыкларын тәкъдим итте, милли музыкаларын тыңлатты. Шулай ук төрле күргәзмәләр оештырылды. Анда татар, төрек, казакъ, төрекмән, үзбәк, таҗик, гарәп, Дагыстан республикасы халыкларының милли яшәешен күрергә мөмкин булды. Фестивальнең икенче өлешендә РИУ студентлары үзләре төшергән документаль фильмнарны күрсәтте. Чарага килгән һәркем төрле халыкларның милли ризыкларны татып карый алды.