Татарстан мөфтие вазифаларын башкаручы Камил Сәмигуллин журналистлар белән очрашуда үз эшендәге биш юнәлеш турында сөйләде. Камил Сәмигуллин узган җомга көнне Казанның “Сөләйман” мәчетендә үткән очрашуны Татарстан диния нәзарәтенең алга таба эш юнәлешләрен аңлатудан башлады. Бу юнәлешләрне ул бишкә бүлеп аңлатты. “Беренчедән нәзарәтнең төп эше бергәлеккә, үсешкә омтылыш булырга тиеш. Без бар кешегә ачык, һәркем белән мөгамәлә корырга, килешергә, сөйләшергә әзер. Әмма экстремизм һәм терорчылыкны яклаучылар белән бер юлда булмаячакбыз”, диде ул.