Accessibility links

Кайнар хәбәр

Вашингтон Сабантуенда быел Башкортстан әләме дә күтәрелде


Вашингтон Сабантуе
please wait
урнаштыру коды

No media source currently available

0:00 0:03:57 0:00

Вашингтон Сабантуе

25 майда үткән чарага төрле штатлардан йөздән артык кеше килде. Сабантуйның төп кунагы – Татарстан һәм Башкортстанның халык артисты Айдар Галимов булды.

Algonkian Regional Park дигән урынга килгән кунаклар өстәлләрдәге тәм-томнәр белән сыйлана алды. Болар барысы да җирле милләттәшләр тырышлыгы белән пешерелгән. Өстәлләрдә гөбәдиядән башлап пәрәмәчләргә кадәр ризык очратып була иде.

Сабантуйны Вашингтонда иң озак яшәүче татарлар – Сәет һәм Рәвилә Сәләхләр гаиләсе ачып җибәрде. Кереш сүздә Рәвилә Сәләх әйтүенчә, беренче Сабантуйны оештырганда кеше әллә ни күп булмаган, ләкин хәзер хәлләр башкачарак. Вашингтон Сабантуе дүртенче ел рәттән татарларны һәм башкортларны җыя.

Чараны оештыручыларның берсе Питтсбургта яшәүче Казан егете Илнар Фатыйхов әйтүенчә, Сабантуй телне сакларга зур өлеш кертә. Оештыручылар бу бәйрәмнән бернинди керем алмаса да, беркайчан да акчасын да, вакытын да кызганмаган. Сабантуй милләтне берләштерү урыны булып тора, диде Фатыйхов.

Сабантуй фәкать татар бәйрәме буларак кына бәйрәм ителми. Башка еллардан аермалы буларак быел АКШ һәм Татарстан байрагы белән беррәттән Башкортстан әләме дә күтәрелде.

Концерт өлешендә балалар төркеме, Бостоннан татар җыр һәм бию ансамбле, Илмир Әхмәтҗанов һәм Айсылу Исмәгыйлева чыгыш ясады. Ә инде концертның төп өлешендә Айдар Галимов җырлады. Чыгышы тәмамлангач ул Азатлык радиосына үз хисләре турында сөйләде.

“Бүген шундый җылы очрашу, җылы мөнәсәбәтләр булды. Хәтта горурлык хисе дә булды. Күңел дә тулып китте дип әйтә алам. Шушы җиргә килеп, океанның аръягында Сабантуй үткәрү, әлбәттә, зур вакыйга”, диде Галимов.

Сабантуй чарасы “Туган тел” җырын башкару белән тәмамланды.

XS
SM
MD
LG