"Туган тел" Самар өлкә татар җәмгыяте зур җыен уздырды. Анда өлкәнең авыл һәм шәһәрләреннән килгән вәкилләр алдында Самар, Тольятти, Сызран, Яңа Куйбышев шәһәрләрендәге татар җәмгыятьләре әйдаманнары һәм авыллардан килгән вәкилләр бүгенге татар проблемнары турында сүз алып бардылар.
Җыенны оештырган "Туган тел" җәмгыяте рәисе, профессор, банкир Ильяс Шәкүровның төп максаты - май аенда Самар татарлары корылтаен уздыру турында халык вәкилләренең фикерен ишетү иде.
Җыенны Самар губерна депутаты Гомәр Вәлитов алып барды. Җыйнак кереш сүзендә тирән фикерләр әйтергә өлгерде һәм милли хәрәкәттәге йомшак якларны әйдаманнарга ипле генә яңгыратты. Менә аның чыгышыннан берничә фикер:
Ильяс Шәкүров
"Идел буе һәм Самар төбәге борынгыдан татарлар яшәгән җирләр. Бүгенге көндә чит төбәкләрдән башка милләтләр безгә күпләп килделәр. Самар төбәгендә тынычлык булсын өчен без бердәм һәм барысыннан да алда булып үрнәк күрсәтеп яшәргә тиешбез. Бу бигрәк тә милли оешмаларга кагыла. Шуны да истән чыгармаска кирәк. Ир бар җирдә ил бар дигән бабаларыбыз. Илебез, милләтебез яшәсен өчен безгә чын ирләр булып яшәргә кирәк. Алдыбызда гаҗәеп зур бурычлар тора - телебезне саклау. Тел булса - милләт бар. Бу чараны уздыру - шул олуг максатның берсе".
