Клинтон авыру сәбәпле Калифорниягә сайлауалды сәфәреннән баш тартты
Узган җомгада АКШ президентына намзәт Һиллари Клинтонда үпкә ялкынсуы башланган, һәм ул Калифорниядә узачак сайлауалды чараларына барудан баш тартырга мәҗбүр булган.
АКШ президентына Демократик фирка намзәте Һилари Клинтон сәламәтлеге сәбәпле Калифорниягә бара алмаячак. Ул 12-13 сентябрьдә Лос-Анджелес һәм Сан-Францискода сайлауалды чараларында катнашырга тиеш булган. Рейтерс хәбәр иткәнчә, җомга көнне Клинтонда үпкә ялкынсынуы башланган.
Якшәмбе Нью-Йоркта 11 сентябрь корбаннарын искә алу чарасында Һилари Клинтонның хәле начарайган иде. Социаль челтәрләрдә Клинтонның машинасы янына чайкала-чайкала баруы төшерелгән видео пәйда булды. Соңрак табиплар Клинтон җомгадан бирле үпкә ялкынсынуыннан дәвалана, аңа антибиотиклар билгеләнде, һәм ул әкренләп терелеп килә, дип белдерделәр.
