Миңнеханов тавыш биргәндә кәефсез күренде
Татарстан президенты Рөстәм Миңнеханов җәмәгате Гөлсинә ханым белән Казанның 42нче сайлау урынында тавыш бирде. Кәефе юклыгы йөзенә чыккан иде. Матбугат хезмәте дә журналистлардан күп сораулар бирмәскә үтенде. Президентның тамагы авырта дип әйттеләр.
Сайлауда хәрәмләшү һәм канун бозу очраклары турында хәбәрләр килә
"Яблоко" фиркасе вәкиле Артур Гыйбадуллин Үзәк сайлау комиссиясенә шикаять юллаган.
"18 сентябрь көнне мин тавыш бирүне http://webvyboryedg.ru рәсми сайты аша күзәтәм һәм Казанның кайбер сайлау бүлгеләрендә сайлау кәгазьләрен сала торган тартмалар (урна) күзәтүгә эләкми, чөнки камералар башка якка юнәлгән (№ 141, 151 (яисә 150, чыбыклар буталган диләр), 156, 168, 170, 171 бүлгеләр фотоларын җибәрәм). Ә 157нче сайлау бүлгесендә веб-камера бөтенләй сүнгән. Трансляция бармый.
Түбән Кама шәһәрендә, 2218 санлы сайлау бүлегенсендә сайлау комиссиясе әгъзасыннан гаризалар һәм шикаятьләр кабул ителми. Сайлау бүлегенә полиция чакыртылган дип хәбәр итә Идел.Реалии сәхифәсе.
Тукай районы Малтабар авылында, 2638 санлы сайлау бүлегендә бүген Татарстан президенты сурәте эленеп тора. Сайлау көнендә агитация тыелган.
Казанда КПРФ фиркасенең сайлау штабы башлыгы урынбасары Алексей Серов хәбәр иткәнчә, 350 һәм 359 сайлау бүлекләрендә күпсанлы студентлар тавыш бирә.
"Бер үк кешеләр берничә тапкыр тавыш биргән, ягъни "карусель" ысулын куллануы турында хәбәребез бар", диде Серов.
Башкортстанның Кырмыскалы районында, 2288 санлы сайлау бүлегендә комиссия әгъзасы һәм интернет басма журналистын физик көч куллану белән куркыталар, дип хәбәр итә "Голос" оешмасы.
Алтай өлкәсендә җитди хәрәмләшүләр турында хәбәрләр килә
Алтай өлкәсенең матбугат үзәгендә "круиз тавыш бирүе" турында хәбәр килгәнен сөйләделәр. Мәгълүмат тикшерелә, дип хәбәр ителә.
Русия Үзәк сайлау комиссиясе җитәкчесе Элла Памфилова сүзләренчә, алар да бу мәгълүматны тикшерә. "Ул фактлар расланса, җитди чаралар күрәчәкбез. Кирәк булса, хәтта, җинаять эшләре ачылачак, сайлау нәтиҗәләрен кире кагу мәсьәләсен дә каралачак" дип белдерде ул.
Казанның "Пирамида" комплексында Бердәм мәгълүмат үзәге эшли
Анда дистәләрчә хәбәрче, "Татмедиа" агентлыклары җаваплы хезмәткәрләре мәгълүмат туплый, даими рәвештә Үзәк сайлау комиссиясе, Җәмәгать пулаты, сәясәт белгечләре белән матбугат очрашулары оештырыла.
"Татарстан-Яңа Гасыр", "Татарстан - 24" каналлары хәбәрчеләре туры элемтәгә тоташып соңгы мәгълүматларны биреп бара. журналистлар өчен бушлай туклану оештырылган.
Компьютерлар, эш урыннары җитәрлек булмау сәбәпле, журналистлар үз гаджетларында яза.
Казанның Миңнеханов тавыш биргән 42нче сайлау урыныннан фотогалерея
Казанның Миңнеханов тавыш биргән 42нче сайлау урыны
Татарстан Үзәк сайлау комиссиясе оештырган Бердәм мәгълүмат үзәге харитасында соңгы мәгълүматлар ирештерелә: 12 сәгатькә Татарстан буенча 34,92 % кеше тавыш бирде.
Иң күп тавыш Аксубай районында бирелгән (81,9%). Икенче урында – Апас районы (77,78%), өченче – Кайбыч районы (77,31%).
Казан районнарында саннар кечкенәрәк: Совет районы – 16,98%. Мәскәү районы – 16,72%. Киров районы – 16,60%.
Фәрит Мөхәммәтшин: "Татарстан депутатлары Думада республика мәнфәгатен якласын иде"
Татарстан парламенты рәисе Фәрит Мөхәммәтшин Казанның 43нче сайлау урынында тавыш бирде. Тавыш биргәннән соң ул Думага сайланачак Татарстан депутатларына теләкләрен җиткерде. Беренчедән, алар Мәскәүдә эшләү дәверендә юлларын табып республикага файда китерергә тиеш. Икенчедән, Русия Думасы микрофоныннан Татарстанда яшәүче халыкның, сайлаучыларның фикерләрен дә җиткерергә тиеш. Кануннарны кабул иткәндә, Татарстанда болай уйлыйлар дип, үз фикерен әйтмичә калмасыннар иде. Мин яңа депутатлар актив булыр дип ышанам, диде ул.
Кукмарада тамгаланган бюллетеньнәр белән секретарь тотылган
Кукмарадагы 1667нче санлы сайлау бүлегендә "Бердәм Русия" өчен тамгаланган 80 бюллетень белән комиссия секретаре тотылган.
Полиция чакырганнар. Русия Үзәк сайлау комиссиясенә шикаять әзерләнә. Секретарь алар бозылган бюллетеньнәр иде дип белдергән.
