Кремль күрсәтмәсе белән Мәскәүдә үткән "Без бердәм" дигән чарада 80 меңләп кеше катнашкан. Бу чарада татарлар да аерым бер төркем булып үтте. Кулларында Мәскәү шәһәре татарларының милли-мәдәни мохтарияте дигән язу да бар иде. Социаль челтәрләргә куелган фотога карата: "Урыс арбасында - Татарлар, алга! Артка типсәләр - Тәгәрәп калма!" "Явыз Иван иконасын тотмаганнар, рәхмәт!" диючеләр дә булды.
Бу чарада КПРФтан кала парламенттагы бөтен фиркаләр дә катнашты дип белдерелә. 3 октябрь көнне Massovki.ru сайтында "Без бердәм" дип аталган митинг-концертка чакыру куелды. Катнашучыларга "юл чыгымнары"н каплау өчен 400 сум акча да вәгъдә иттеләр.
4 ноябрь Русиядә Халыклар бердәмлеге көнен бәйрәм итәләр. Левада сораштыруларына күрә, фикер белдерүдә катнашкан халыкның 56 проценты нинди бәйрәм икәнлеген әйтеп бирә алган. Күпчелек исә бу көнне бәйрәм итәргә җыенмавын белдергән.
