Тарих институты мөдире Рафаил Хәкимов Азатлыкка комментар биреп, Идел буе, Себер татарларын һәм кырымтатарларны бөтенләй аерым халыклар итеп күрсәтүче генетик тикшеренү нәтиҗәләрен халыкларны бүлгәләү сәясәтенең дәвамы дип атады. Русия фәннәр академиясенең медицина-генетика фәнни үзәге үткәргән тикшеренү нәтиҗәләре басылып чыкканнан соң галимнәр арасында гауга күтәрелде. Анда Медик-генетик фәнни үзәгенең кеше популяциясе генетик лабораториясе башлыгы, биология фәннәре докторы Елена Балановская фәнни җитәкчелегендә генетик тикшеренү уздыручылар әлеге өч төркем арасында генетик уртаклык юк дип белдерә.