29 апрельдә Русиякүләм "Туйдырдың" чарасында Казанда полиция ике кешене тоткарлады. Башта бу протест чарасын оештырган "Ачык Русия" хәрәкәте шурасы әгъзасы Дарья Кулакова тоткарланды. Чара тәмамланганнан соң 10 минут узгач анда катнашкан Ләйсән Исмәгыйлеваны алып киткәннәр. Чара кысаларында 20ләп кеше Русия президенты Владимир Путинның Казандагы кабул итү бүлмәсенә хатлар тапшырган. Алар Путинның 2018 елгы президент сайлауда катнашмавын таләп итә.