Башкортстанда коррупциягә каршы көрәш җитәкчеләренең берсе үзе коррупциядә гаепләнә. Русия эчке эшләр министрлыгының Башкортстан бүлегендә Икътисади иминлек һәм коррупциягә каршы көрәш идарәсе җитәкче урынбасары Илнур Йосыпов вазифасыннан алынды. Аның милек декларациясендә күрсәтелмәгән 200 миллион сумлык байлыгы табылды. Кыйммәтле машиналар, фатирлар, 200 дүрткел метрлы йорт, 37 һектар җир. Алар барысы да соңгы өч елда сатып алынган. Шул ук вакытта, гаиләсенең еллык рәсми кереме 1,5 миллион сумнан артмаган. Майор милекне сатып алу өчен акчаның каян килгәнен дә аңлатып бирә алмаган.