Җәмгыять рәисе Михаил Щеглов "Вконтакте" төркемендә язуынча, ул Донбасс ихтыярилары берлегенең Татарстан бүлгесе белән сөйләшүләр алып бара.
"4 ноябрьдә залда җыелыш уздырабызмы яки урамда митингмы – анысы ачык булып кала. Ләкин тавыш бирүчеләрнең күпчелеге митинг кирәк ди. Чарада күп халык катнашачак, шуңа күрә оештыручылар катнашучыларның иминлеге турында уйларга тиеш. Полиция – аңлашыла. Ләкин без Донбасс ихтыярилары берлегенең Татарстан бүлгесе белән сөйләшүләр алып барабыз", дип яза Щеглов.
Аның сүзләренчә, берлек җитәкчеләренең берсе Александр Бородай Урыс мәдәнияте җәмгыяте хатын алган.
Александр Бородай – сәясәт белгече, журналист, эшмәкәр. 2014 елның 16 маеннан 7 августына кадәр Русия ярдәме белән эшләүче фетнәче "Донецки республикасының министрлар шурасы" рәисе, соңрак рәис урынбасары булды. Хәзер Донбасс ихтыярилары берлеге рәисе.
4 ноябрьдә Татарстандагы урыс мәдәнияте җәмгыяте һәм Урыс телле ата-аналар комитеты Казанда республика ата-аналар җыелышы уздырмакчы. Ул митинг формасында да узарга мөмкин. Оештыручылар "Мәскәүдән ярдәм бар", дип белдергән иде.
Шул ук вакытта Казан мэриясе 3 ноябрь башкалада татар телен яклап митинг үткәрүгә рөхсәт бирмәде. Мэрия оештыручыларга иминлек чараларын тәэмин итү таләбе куя.
Безнең Telegram каналына язылыгыз! Иң кызыклы хәбәрләрне беренче булып укыгыз.
