Accessibility links

Кайнар хәбәр

Европаның 11 иле "Русиянең Грузиягә басып керүе турында" белдерү ясады


Русия оккупациясенә каршы митинг, Грузия, 2018 елның 7 августы

Европадагы иминлек һәм хезмәттәшлек оешмасы (ОБСЕ) әгъзалары булган 11 ил Русия белән Грузия арасындагы сугышның 10 еллыгына белдерү белән чыкты. "Грузия дуслары төркеме" дип аталган рәсми булмаган оешма Мәскәүне Абхазия белән Көньяк Осетиянең бәйсезлеген тануны кире кагарга чакырды.

"Русиянең Грузиягә бәреп керүенә ун ел узганнан соң да Грузия җирләренең һаман оккупациядә булуына карата борчылу белдерәбез. Без низагның БМО Хартиясе, Һелсинки килешүләре һәм халыкара хокукларның фундаменталь нормалары һәм принциплары нигезендә чишүнең кирәклегенә басым ясыйбыз", диелә белдерүдә.

Документны имзалаган илләр шулай ук Грузиядә ОБСЕның күзәтү миссиясен төзү дә кирәк дип саный.

Грузиянең бербөтенлеген яклап АКШ Дәүләт департаменты да белдерү белән чыкты.

10 ел элек Русиянең кораллаы көчләре Абхазия һәм Көньяк Осетия ягында Грузия белән бәрелешкә керде. Русия һәм үзбилгеләнгән Көньяк Осетия, Абхазия җитәкчелегенең рәсми фикеренә караганда, аларның "солых булдыру" дип аталган гамәлләре Грузиянең Көньяк Осетия халкына карата агрессиягә җавап булган. Тифлистә исә бу Русия тарафыннан планлаштырылган агрессия иде дип белдерәләр.

Шул ук елның 25 августында Русия Көньяк Осетия һәм Абхазияне бәйсез дәүләтләр дип таныды.

Быел июньдә НАТОның баш секретаре Йенс Столтенберг Грузия альянсның әгъзасы булачак дип белдерде. Моңа җавап итеп Владимир Путин Мәскәү әлеге адымга "кискен тискәре" җавап бирәчәк, чөнки бу "Русия иминлегенә яный" дип әйтте. Русия премьер-министры Дмитрий Медведев Грузиянең НАТОга керүе "куркыныч" низаг тудырачак диде.

фикер әйт

фикерләрне күрсәт

XS
SM
MD
LG