"Азатлык" татар яшьләре берлеге Хәтер көне чараларын башлап җибәрде. Берлек лидерларының берсе Наил Нәбиуллин Азатлыкка сөйләвенчә, алар Казанны яклап шаһит киткәннәр өчен куелган таш янында җыелган. "Әлеге урында һәйкәл булырга тиеш. Без бу гамәлләребез белән һәйкәлнең кирәклеген тагын бер кат искәртәбез һәм моны таләп итәчәкбез", ди акивист.
Хәтер көненә багышланган матәм чарасы быел 13 октябрьгә билгеләнгән. Ләкин төрле сәбәпләр табып хакимиятләр урам чарасын килештерүдән баш тарта. Йөреш тыелган, митинг Тинчурин бакчасында булырга мөмкин. Белдерү хатларын хакимиятләргә Татар иҗтимагый үзәге дә, "Азатлык" берлеге активисты Рәфыйкъ Кәримуллин да керткән.
