Башкортстанда көзге каникулларга тагын бер атна өстәләчәк. Балалар ялга иртәрәк китә. Бу турыда Башкортстан республикасы хөкүмәтендә үз чыганакларына таянып ufa.aif.ru хәбәр итә.
Башкортстанда көзге каникуллар 26 октябрьдә башланып 10 көн – 5 ноябрьгә кадәр барырга тиеш иде. Ялларны бер атна алдан – 19 октябрьдә башларга дигән карар кабул ителгән. Шулай итеп, каникуллар 17 көн дәвам итәчәк.
Каникулларны озайту укытучыларның иминлеген тәэмин итү өчен кирәк, чөнки алар COVID-19 эләктерү куркынычы булган төркемгә керә диелә. Укытучылар эпидемиянең иң көчле вакытын уздырып җибәрсен өчен шулай эшләнә дип аңлатканнар хөкүмәттә.
7 октябрьдә Башкортстаннның 112 мәктәбе коронавирус сәбәпле карантинга ябылды дип хәбәр ителде. Барлыгы 203 сыйныф дистанцион укуга күчерелгән.
