Accessibility links

Кайнар хәбәр

Ялтаны су басу нәтиҗәсендә шәһәргә керү тыела


Ялтада су басу

Шәһәр үзәгендә электр энергиясе өзелгән, кешеләргә эчәр су җыеп калырга киңәш ителде.

Русия тарафыннан аннексияләнгән Кырымдагы иң зур курорт шәһәре Ялта урамнарын су басу сәбәпле гадәттән тыш хәл тәртибе кертелде. Шәһәргә керү тыела. Бу турыда Ялтадагы Русия хакимияте башлыгы Янина Павленко белдерде.

"Елгалар ярларыннан ташып чыкты, шәһәр үзәген су баса. Кешеләрне эвакуациялибез. Иң мөһиме, шәһәр үзәге тулысынча ябык", диде ул видеомөрәҗәгатендә. Павленко әйтүенчә, "вазгыять шундый ки, хәзер контроль итеп булмаган су ташкыны машиналарны, кешеләрне агыза". Хакимият кешеләрне өйләреннән чыкмаска өнди.

Соңрак Павленко кешеләргә эчәр су туплап куярга да киңәш итте. Шәһәр үзәген электр энергиясе белән тәэмин итү туктатылды. "Говорит Москва" радиосы хәбәр итүенчә, Ялтада 80 кече трансформатор станциясе туктатылган, 2,7 мең кеше электрсыз калган.

Казага каршы көрәшкә Русиянең Кара диңгез флоты хәрбиләре җибәрелгән.

Ялта тирәсендәге Зур Ялта дип аталган җирләрдә дә юл аша чыгу урыннары, кайбер урамнар, шулай ук кайбер күпфатирлы йортларны су баскан. Ялта янындагы Форос бистәсендә электр энергиясен өзү сәбәпле, су тәэминаты тукталган.

Әлегә корбаннар турында хәбәрләр юк.

Ялтада су басу ярымутрауның көнчыгышындагы Керич шәһәрен 17 июньдә су басканның икенче көнендә башланды. Җомгага каршы төндә шәһәргә бер ай нормасы саналган яңгыр яуган диелә. Нәтиҗәдә Учан-Су (Водопадная) елгасы ярларыннан ташып чыккан.

Социаль челтәрләрдә Ялтадагы хәлләр турында видеолар тарала.

Керичтә кичә башланган су басу нәтиҗәсендә биш урамны, 230 шәхси һәм күпфатирлы йортны су басуы хәбәр ителә. Керичтә корбаннар булуы хәбәр ителми.

🛑 Әгәр сезнең провайдер безнең сайтны томалап куйса, аптырамагыз, телефон йә планшетыгызга Азатлыкның RFE/RL әсбабын йөкләгез (App Store һәм Google Play кибетләрендә бушлай) һәм татар телен сайлагыз. Без анда да ничек бар, шулай!
🌐 Шулай ук, безнең Telegram каналына кушылырга онытмагыз!

фикерләр (2)

бу форум ябык
XS
SM
MD
LG