Путинның дусты саналган Жерар Депардье сугышка каршы булуын белдерде
Владимир Путин белән тыгыз бәйләнеше белән танылган француз актеры Жерар Депардье Украинадагы сугышка каршы булуын белдерде. France Presse хәбәрчесенә Депардье: "Русия һәм Украина һәрвакыт тугандаш илләр иде. Бу туганнар сугышы. Шуны әйтергә телим: атышны туктатыгыз һәм сөйләшүләр башлагыз."
Бер ай элек, Украина тирәсендә низаг куера барганда, Депардье Путин белән фотосын социаль челтәрләргә урнаштырды, һәм Франция телевидениесенә биргән әңгәмәдә: "Владимирга тимәгез" дигән иде.
2013 елда, Депардье салымны арттыруга протест йөзеннән Франциядән китте (соңрак ул кире кайтты). Путин Русиядә популяр актерга Русия ватандашлыгы бирде.
Харьковка һөҗүмнән соң Украина президенты Владимир Зеленский Русияне "террорчы дәүләт" дип атады
Шәһәр хакимиятләре мәгълүматына күрә, бу һөҗүм нәтиҗәсендә кимендә ун кеше үлгән. Харьковта дүшәмбе һәм сишәмбе көнне булган башка атышларда да тыныч халыкның һәлак булуы билгеле. Үлүчеләрнең берсе – Һиндстан студенты.
Русия саклану министры Сергей Шойгу Русия гаскәренең Украина җирләрендәге махсус операция дип аталучы һөҗүменең "куелган максатларга ирешкәнгә кадәр" дәвам итәчәген белдерде. Аның сүзләренчә, гаскәр "югары төгәллекле коралдан бары тик хәрби объектларга гына" һөҗүм итә.
Шул ук вакытта снарядлар һәм ракетларның торак йортларга һәм сивил объектларга да эләгүенең күпсанлы дәлилләре бар. Украина тарафының рәсми мәгълүматларына күрә, йөзләрчә тыныч халык һәлак булган.
"Евровидение-2016" бәйгесе җиңүчесе, кырымтатар җырчысы Җамала балаларын алып Киевтән китте
"24 февраль төнлә без балалар белән Киевтан чыгып киттек, дүрт тәүлек диярлек машинада, кая туры килсә шунда туктап хәл алып, юлда уздырдык. Миллионлаган хатын-кыз һәм балалар, фатирларын, әйберләрен ташлап, ирләрен илне сакларга калдырып, балаларын снарядлардан коткарыр өчен кача" дип язган Җамала Instagram-дагы сәхифәсендә.
Аның сүзләренчә, сугыш башланганнан бирле Украинада 16 бала һәлак булган, 200гә якын бала яраланган. Киев халкы бомбалардан качып утырган метрода алты бала дөньяга килде, дип яза җырчы.
Җамала үзенең язмасында русияләргә мөрәҗәгать итеп, дәшми тормаска, мәйданнарга чыгарга һәм сугышны туктатырга өнди.
Прага урамнарында, җәмәгать транспортында Украинага теләктәшлек йөзеннән Украина байраклары элә башладылар
Европа уеннарыннан читләтелгән Русия футбол клубларыннан чит ил тренерлары китә башлады
- Германиядән Маркус Гисдоль Мәскәүнең "Локомотив" баш тренеры вазифасыннан китә.
- Украиналы Андрей Воронин Мәскәү "Динамо" сының баш тренеры ярдәмчесе вазифасыннан китә. Бусы -Европа ярышлары белән генә бәйле түгелдер.
Сугышка каршы шигарләр Казан урамында да күренә башлады. Казан, 1 март иртәсе
Google бар Европада RT һәм Sputnik-ның YouTube-каналларын томалый
"Украинада барган сугыш аркасында, без бар Европада Russia Today һәм Sputnik белән бәйле YouTube каналларын томалыйбыз. Моны тулысынча тормышка ашыру өчен безнең системаларга күпмедер вакыт кирәк булачак " диелә рәсми белдерүдә.
Херсон урамнарында - Русия бронетехникасы
Моны Херсон өлкәсе администрациясе башлыгы Геннадий Лагута "Украинская правда" басмасына раслаган. Херсон урамнарыннан видеоязма: