Львов мэры Андрей Садовой кайнар нокталардан эвакуацияләнгән украиннарга вакытлыча яшәү өчен контейнерлар шәһәрчеге төзелүен сөйләде. "88 торак контейнерда 350 дән артык кеше яши алачак. Бер өйдә 2-4 кеше яши ала. Эчендә кирәкле җиһазлар, яктылык, җылылык бар. Санузеллар һәм ашханә шәһәр территориясендә урнашкан", дип белдерде мэр.
Кушма Штатлар "Аэрофлот", Azur Air һәм Utair Русия авиаширкәтләрен 180 көнгә экспорт өстенлекләреннән мәхрүм итте. Бу хакта АКШ Сәүдә министрлыгы хәбәр итә.
Карарны "экспорт санкцияләрен бозуның дәвам итүе" белән аңлаттылар. "Без аларны АКШ тауарларын алу мөмкинлегеннән генә түгел, ә чит илдәге Америка тауарларын реэкспортлаудан да мәхрүм итәбез. Безнең экспорт контролен боза торган теләсә нинди ширкәт, бигрәк тә Владимир Путин мәнфәгатьләрен яклаучылар һәм Украина халкына зыян салучылар, хокук куллану чараларының бөтен куәтен тоячак", дип белдерде сәүдә министры Джина Раймондо. Сәүдә министры урынбасары Дон Грейвс бүгенге гамәлләр белән махсус контроль чараларына буйсынмаучыларга ачык сигнал җибәрелә, диде.
Дмитрий Муратовка поездда буяу атканнар
Билгесез кеше "Новая газета" баш мөхәррире һәм Нобель премиясе иясе Дмитрий Муратовка ацетонлы буяу ыргытып һөҗүм иткән. Ул "Муратов, бу сиңа безнең егетләребез өчен" дип кычкырган, ди Муратов.
Берләшкән милләтләр оешмасының гомум мәҗлесе Русияне кеше хокуклары шурасында катнашуыннан туктатып тора. Бу Украинадагы сугыш белән бәйле.
Тавышка куелган резолюциядә әйтелгәнчә, Украинада барган сугышта Русия хәрбиләре тарафыннан дорфа һәм системлы рәвештә кеше хокуклары бозыла. Кеше хокуклары шурасыннан Русияне чыгаруны 93 ил хуплап тавыш биргән. 24 ил, шул исәптән, Кытай һәм Казакъстан каршы булуын белдергән. 58 дәүләт, алар арасында Һиндстан да бар, тавыш бирүдән тыелып торган.
Тыелып калучыларны исәпкә алмаганда, резолюцияне кабул итәр өчен 193 илнең өчтән икесе тавыш бирүе кирәк. Reuters мәгълүматларынна күрә, Русия әлеге карарны яклап тавыш бирүчеләрне яисә тыелып калучыларны үзенә карата дустанә булмаган адым дип бәяләячәген кисәткән.
Моңа кадәр Русия Украинада халыкка карата булган агрессия гаепләүләрен кире кагып килде. БМОның кеше хокуклары шурасы эшеннән аерым дәүләтләрне туктатып тору сирәк була. Соңгы тапкыр мондый хәл 2011 елның мартында булды. Ул вакытта Либиянең эшчәнлеге туктатылган иде. Бу диктатор Муаммар Каддафиның хакимияткә каршы чыгыш ясаган катнашучыларына карата хәрби көчләр куллануы белән бәйле булды.
Мәскәү кеше хокуклары шурасыннан читләштерелгәннән соң утырышларда һәм тавыш бирүдә катнаша алмаячак. Шул ук вакытта Русия дипломатларына дебатларда утыра алачак. Reutersның дипломатлар даирәсендәге чыганаклары хәбәр иткәнчә, Русия үзенең ышанычлы затлары белән БМОның шурасына йогынты ясарга тырышачак.
АКШ алмаз чыгаручы "Алроса" ширкәтләре төркеменә һәм "Объединенная судостроительная корпорация"гә (ОСК) томалаучы санкцияләр керткән. Чикләүләр исемлегенә ОСК мөдирләр шурасының 8 әгъзасы да эләккән.
АКШ финанс министрлыгы матбугат хәбәрендә әйтелүенчә, яңа санкцияләр сугыш алып бару өчен Русияне "өстәмә керемнәрдән" мәхрүм итәчәк.
Русия байларының яхталары хәзер кайда?
Русия олигархларының кыйбатлы яхталары юридик проблемнарга килеп бәрелде. Кремль Украинага каршы сугыш башлаганнан соң, президент Владимир Путинның якыннарына басым ясау өчен кертелгән чикләүләр нигезендә, хакимиятләр хәзер бар дөнья буйлап аларның яхталарын да эзли һәм кулга ала.
Азатлык фотогалереясында шундый берничә яхтаның сурәтләрен тәкъдим итәбез. Аларның кайберләре Русия хакимияте вәкилләренеке дип санала, ә иң кыйбатлысы хәтта яшерен рәвештә Путинныкы да булырга мөмкин диелә.
Русия байларының яхталары хәзер кайда
Бучада үтерелгән 163 кешенең шәхесе ачыкланган. Бу хакта шәһәр мэры Анатолий Федорук "Америка авазы"на биргән интервьюда әйткән. Хәзерге вакытка Бучада барлыгы 320 кешенең һәлак булуы билгеле. Федорук яңа җәсәдләр көн саен табылып тора дип искәртте.
Донецки өлкәсенең Краматорски тимер юл вокзалына җомга ракет һөҗүме ясалган. Дистәләгән кешенең һәлак булуы хәбәр ителә.
Донецки өлкә хакимияте башлыгы Павел Кириленко вокзалга Русиянең “Искәндәр” ракетын атканнар ди. “ДНР” фетнәчеләре исә һөҗүмне Украин гаскәрләре “Точка-У” ракеты белән ясаган ди.