Киев янындагы Буча һәм башка шәһәрләрдә сивил халыкны күпләп үтерү турындагы хәбәрләрдән соң, Европа берлеге Русиягә каршы яңа чикләүләр әзерли. Европа шурасы моңа Мәскәү җаваплы дип саный, Франция президенты Эммануэль Макрон Европа берлеге илләренә Русиядән күмер һәм нефть сатып алуны тулысынча туктатырга тәкъдим итте.
Европа шурасы белдерүендә әйтелгәнчә, Русия контролендәге Украина җирләрендә кылынган күпләп үтерүләр Европа тарихында мәңгегә калачак.
Текстта, Русиянең үз контролендәге җирләрдә кылынган җинаятьләр өчен җаваплы булуы искәртелә.
Русиягә каршы чикләүләр турында Европа берлеге илләре вәкилләре 6 апрельдә фикер алышачак.
Польша премьер-министры Матеуш Моравецкий берлек лидерларының ашыгыч саммитын уздырырга чакырды. Аның сүзләренчә, яңа чикләүләргә Германия каршы килә. Шул ук вакытта Германия канцлеры Олаф Шольц Бучадагы күпләп үтерүләр белән бәйле, Русиягә каршы чикләүләрне кырыслатырга кирәклеген белдергән иде.
Русия оккупациясеннән соң Буча урамнарында мәетләр таралып ята (фотодәлилләр)
Мәскәү күпләп үтерүләргә кагылышлы гаепләүләрне кискен кире кага һәм алар турындагы мәгълүматны провокация дип атый. 3 апрель көнне Мәскәү бу хәл турында фикер алышу өчен БМОның Иминлек шурасының ашыгыч утырышын оештырырга ниятләвен белдерде.
Дүшәмбе көнне Русия тышкы эшләр министрлыгы вәкиле Мария Захарова Telegram-да, утырышка Британия рөхсәт бирмәде дип хәбәр итте, шулай да Русия очрашу уздыруны таләп итәчәк диде.
Русия тикшерү комитеты башлыгы Александр Бастрыкин Баш тикшерү идарәсенә Бучадагы сивил халыкны үтерү турындагы мәгълүматны анализларга һәм бу хактагы материалларда Русия гаскәре турында ялган мәгълүмат тарату белән бәйле канун бозу бармы икәнен тикшерергә кушты.
Путин Украинага каршы сугыш башлаганнан соң, Русия думасы ашыгыч рәвештә Җинаять кодексына шундый маддә өстәгән иде.
🛑 Азатлык сайтын томаласалар, нишләргә? Бу хакта безнең кулланма.
🌐 Безнең Telegram каналына да кушылырга онытмагыз!