Кайнар хәбәр

"Баймак эше" фигуранты Әхмәт Якупов ачлык игълан иткән

Әхмәт Якупов
Әхмәт Якупов

Аны штраф изоляторына утыртканнар.

"Баймак эше" фигуранты 62 яшьлек Әхмәт Якупов Оренбурның 1нче тикшерү изоляторында ачлык игълан иткән. Аны штраф изоляторына утыртканнар.

Бу хакта аның туганнары Telegram-каналында хәбәр итте.

Аның җинаять эшен мәхкәмә 21 августта карый башларга тиеш.

"Адвокат әтием янына Оренбурга барган, аны ШИЗОдан алып килгәннәр, — дип язган гаепләнүченең кызы. — Ул анда инде тугызынчы көн утыра икән, бүген соңгы көне. Уфадан азык-төлек салынган сумкасын бирмәгәннәр өчен бәхәсләшкән. Ул өч көнлек ачлык игълан иткән. Бик начар ашаталар, дип язган ул хатында".

Элегрәк Азатлык Радиосы Әхмәт Якупов турында җентекләп сөйләгән иде. Ул — Башкортстанның Ишембай районы Әптек авылыннан, актив җәмәгатьче һәм һәвәскәр артист. Аны 2024 елның 22 гыйнварында, Баймактагы киңкүләм протестлардан биш көн узгач, өендә тоткарладылар.

Әле 2024 елның җәендә үк тикшерүнең "активистлар арасыннан 10-15 кешене аерып алып, аларны "тәртипсезлекләрнең урындагы оештыручылары һәм координаторлары дип билгеләве" турында беренче хәбәрләр күренә башлады. Алар арасында Әхмәт Якупов та бар иде.

2024 ел ахырында тикшерү комитеты "Баймак эше"ндә "киңкүләм тәртипсезлекләрне оештыручылар" дип билгеләнгән ун кешегә ахырга гаепләү белдерде. Аларның барысын да, шул исәптән Якуповны да "киңкүләм тәртипсезлекләр оештыру"да (Русия Җинаять кодексының 212 маддәсе, 1 өлеше) гаепләделәр.

Моның белән беррәттән шушы ун кеше арасында алты кешегә, шул исәптән Якуповка да "хакимият вәкиленә карата гомергә һәм сәламәтлеккә куркыныч тудырмаучы көч куллану" (Русия Җинаять кодексының 318 маддәсе, 1 өлеше) турында гаепләү белдерелде.


🛑 Русиядә Азатлык сайты томаланды, нишләргә?Безнең кулланма.
🌐 Безнең Telegram каналына да кушылырга онытмагыз!

​
XS
SM
MD
LG