Accessibility links

Кайнар хәбәр

Rusiä Ukrainağa gaz cibärüen kimette


Räsmi Kiev Mäskäwneñ gaz mäsäläsendä soñğı täqdimen kire qaqannan soñ, Gazprom şirkäte Ukrainağa gaz cibärüen kimette.

1 Ğinwar irtäsendä Rusiäneñ däwlät qaramağındağı Gazprom şirkäte Ukrainağa gaz cibärüen kimetüe turında belderde. Bu turıda Gazpromnıñ süzçese Sergei Kuprianov xäbär itte. "Kilep tuğan wazğiättä, äytergä kiräk, Ukraina yağı arqasında tuğan wazğiättä, bez Ukrainanıñ gaz çeltäre kereşendä basımnı kimetergä mäcbür buldıq," dide ul.

Şulay itep, Mäskäw belän Kiev arasında aylar buyı barğan nizaqnı xäl itü tırışlıqları näticä birmäde. Gazprom 1 Ğinwardan başlap Ukrainağa gaznı 4 tapqır qimmäträk sataçağın belderde. Kiev moña qarşı çıqtı, bäyäne aqrınlap kütärergä soradı. Kiev Rusiäneñ Ukraina aşa Könbatışqa quğan gazınıñ ber öleşen alu ixtimalın äytkäç, bäxäs tağı da kiskenläşte.

Yäkşämbe kiçendä Rusiä prezidentı Vladimir Putin, Kievqa soñğı täqdim yasap, ägär Ukraina 1 Aprildän yaña bäyägä rizalaşsa, 3 ay buyına gaznı iske bäyägä satırğa täqdim itte. Bu täqdim dä kire qağılğaç, Gazprom Ukrainağa gaz cibärüne kimetä başlağan. Gazprom wäkile Sergei Kuprianov kilep tuğan wazğiät öçen Kievnıñ üzen ğäyepläde:

"Ukraina xakimiätläre aldan uq nizaqqa äzerlängän, 1 Ğinwardan başlap gaznı urlıy başlarğa cıyınğan. Bezneñ täqdimne kire qağu Ukrainanıñ iqtisadı, xalqı öçen bik zur orım bulaçaq. Ukraina xakimiätlärenä bu ğämällären xalqına añlatu bik awır bulaçaq," dide Gazprom wäkile.

Kiev Könbatış öleşenä kererme-yuqmı, älegä äytü qıyın. Bu anıñ Yevropa illäre belän mönäsäbätenä zıyan kiterer ide.

Rusiä-Ukraina mönäsäbätlärenä kilgändä, alar äflisun inqilabınnan soñ bozıldı. Ul inqilap näticädäsendä xakimiätkä Mäskäw taraflı Viktor Yanukoviç tügel, ä Könbatış taraflı Viktor Yuçenko kilde.

Ukraina räsmiläre Mäskäwneñ gaz bäyäsäen şulay kisken kütärüen dä şunıñ belän añlata. Rusiä belän yaxşıraq mönäsäbättä bulğan başqa illärgä, äytik, şul uq Belarusqa gaz tübän bäyägä satıla.

Rusiäneñ Könbatış Yevropağa satqan gaznıñ zur öleşe Ukraina aşa quıla. Älegä Gazprom Yevropa illären kileşengän külämdä gaz belän tä''min itergä wäğdä itä. Ämmä bu wazğiät Yevropada inde borçılu uyata başladı. Yevropa Berlegeneñ energetika räsmiläre Ğinwarnıñ 4ndä ğädättän-tış oçraşuğa cıyıla.

Älege wazğiät Rusiäneñ Zur 8lektä, bügen başlanğan räislegenä dä külägä töşerä. Mäskäw üzen energetika ölkäsendä ışanıçlı partner itep kürsätergä tırışqanda, mondıy nizaqlar Könbatışnıñ Rusiägä ışanıçın kimetergä mömkin.

ali gilmi
XS
SM
MD
LG