Accessibility links

Кайнар хәбәр

Ağafurovlar yortında Yaña yıl oçraşuları


Yekaterinburg şähäreneñ näq urtasında urnaşqan ike qatlı cıynaq qına matur bizäkle yort xalıq telendä “Ağafurovlar yortı” dip atala. Bügen bu yortta Tatarstan respublikasınıñ Ural töbägendäge daimi wäkillege urnaşqan. Küptän tügel biredä oyıştırılğan “Ağafurovlar yortında Yaña yıl oçraşuları” dip atalğan kiçä şuşı yort tözelügä 110 yıl, wäkillek eşli başlawğa 10 yıl tuluğa bağışlandı.

Zäwıq belän bizälgän, borınğı şämdällärgä yandırılıp quyılğan şämnärneñ sixri yaqtısına örtelgän qunaq zalına ul könne Ural töbägeneñ zıyalıları cıyıldı. Qunaqlar arasında zur ğalimnär, yazuçılar, şağirlär, säyäsätçelär, bank citäkçeläre, jurnalistlar häm başqa kürenekle şäxeslärne kürergä bula ide. Alarnıñ barısın da bu tarixi yortnıñ elekkege xucaları bulıp kiengän, Zäynetdin Ağafurov qiäfätendäge Ädim Tahirov, Zäynetdinneñ xäläle, Äsmäbikä qiäfätendäge Ğäliä xanım Bikbova häm yortnıñ bügenge “xucası” – Tatarstannıñ Uraldağı daimi wäkile Rawil Bikbov qarşı aldı. Qısqa ğına säxnäläşterelgän tarixi küreneş kürsätep alğannan soñ, kiçäneñ ikençe öleşenä küçtelär. Üzeneñ sälämläw çığışında Rawil äfände Bikbov qunaqlarnı ber-berse belän tanıştırıp çıqtı, alarnıñ härberseneñ dä cämğiät külämendä ireşkän uñışların, Tatarstan belän ike aradağı bäyläneşlärne nığıtuğa häm Sverdlovski ölkäse tatarlarınıñ milli tormışı üseşenä kertkän öleşlären bilgeläp, kiläçäktä dä bergäläşep eşlärgä ışanıç belderde.

Annan soñ süz qunaqlarnıñ üzenä birelde. Zäynetdin Ağafurov bulıp kiengän Ädim ağa Tahirov untuğızınçı yözdä Yekaterinburg şähärendä yäşägän ataqlı tatar säwdägärläreneñ yaqın tuğanı bulıp çıqtı. Ul Ağafurovlarnıñ uncidençe yıl inqilabınnan soñ bulğan yazmışı turında söyläde. Anıñ süzlären tarix fännäre kandidatı, Sverdlovski ölkäseneñ töbäkne öyränü muzey direktorı urınbasarı Svetlana Korepanova bik qızıqlı tarixi mäğlümatlar belän tulılandırdı.

Kiçäneñ töp teması bulıp Ağafurovlar ğına tügel, Qazan, anıñ meñyıllıq tarixı, Yekaterinburg belän bulğan tarixi bäyläneşlär tordı. Qunaqlar üzläreneñ ütkän yıldağı tä'sirläre belän urtaqlaştılar, yaña yılğa yaña eşlär turında fiker alıştılar. Çığışlar arasında kiçäne Tatarstannıñ atqazanğan artistı Xäydär Gıl'fanov, Ural däwlät konservatoriäse studentı Güzäl Şaxmatova häm başqalar başqaruında matur tatar cırları bizäde.

Qunaqlar kiçädän bik qänäğät qaldılar. Böyek Watan suğışı veteranı, kürenekle säyäsätçe, jurnalist, bik ölkän yäştä buluına qaramastan, äle dä safta bulğan Yuri Abramoviç Levin bu yortta berençe tapqır bulğanlığın äytep, üzeneñ tä'sirlären bolay dip belderde: - “Min bügen iskitkeç yort belän tanıştım, bik qızıqlı keşelär belän oçraştım. Ural xalıqlarınıñ ğöref-ğadätlären, tarixın şulay saqlap qala aluçı keşelär barlığı belän ğorurlanam”.

Ural däwlät konservatoriäse rektorı, Rusiäneñ atqazanğan artistı, professor Şäwkät Ämirov, kiçädäge cılı, duslarça oçraşunı bik ğadi itep taswirladı. “Ätiem, äniem belän qunaqlar kilgändä şulay matur itep cırlaşıp, söyläşep utıra idek. Öydäge kebek, bik matur kiçä. Xucalarğa bik zur räxmät”, - dide ul.

Ağafurovlar yortına duslarça oçraşuğa kilüçelär xucalarğa olı räxmät äytep, bergälek xisläre toyıp, yaña eşlärgä därtlänep taralıştılar.

Fäwiä Safiullina

Yekaterinburg.

XS
SM
MD
LG