Accessibility links

Rusiä häm Törkmänstan prezidentları oçraştı. Kön tärtibendä – gaz


Düşämbedä Rusiä prezidentı Vladimir Putin Mäskäwdä Törkmänstan prezidentı Saparmurat Niazov belän oçraştı. Söyläşülär nigezdä gaz tiräsendä barğan, taraflar bu ölkädä xezmättäşlekne kiñäytergä kileşkän dip xäbär itelä.

Çit illärgä bik siräk yörüçe Törkmänstan prezidentı Saparmurat Niazov Mäskäwgä yäkşämbedä kilep töşte häm düşämbedä Rusiä prezidentı Vladimir Putin belän oçraştı. Jurnalistlar aldında ike prezident ta energetika ölkäsendä xezmättäşlekne kiñätü kiräklege turında söyläde.

"Uzğan yıl axırında bez Törkmänstan belän yağulıq mäsäläsendä kileşü imzaladıq. Min sezneñ xezmättäşlekne kiñäytü täqdimegezne qatğıy räweştä xuplıym, häm citeşterü häm transport itü ölkäsendä," di Rusiä prezidentı.

Capaw itep Törkmänstan prezidentı xezmättäşlek itergä äzerlek berlderde. "Törkmanstan bu ölkädä Rusiä belän xezmättäşlek itäçäk. Zur proyektlarda qatnaşaçaq, häm citeşterü häm transport itü ölkäsendä, Törkmän gazın Könçığışqa häm Yewropağa çığaru – tınıçlıq wä iminlek mänfäğätendä," di Saparmurat Niazov.

Jurnalistlar aldında şulay oxşaş yañğırasalar da, här tarafnıñ älbättä üz mänfäğäte. Törkmänstan üz gazı öçen Gazpromnan kübräk aqça alırğa teli. Rusiä Törkmänstannan kilgän çağıştırmaça arzan gazınıñ külämen arttırırğa tırışa.

Xäzer Gazprom meñ kubometr Törkmän gazı öçen 60$ tüli. Berniçä yıl elek bulğan 32$ belän çağıştırğanda bu älbättä kübräk. Läkin Rusiä üze Könbatışqa gaznı 230$-ğa sata häm şul uq bäyäne uzğan ayda Ukrainadan qısıp mataştı.

Qayber mäglümätlärgä qarağanda Niazov üz gazınıñ bäyäsen 80-85$-ğa kütärergä teli. Häm dä anıñ moña xaqı bar kebek. Mäskäwneñ Kiev belän soñğı gaz suğışı häm dä bu könnärdä Rusiädä torğan salqınnar belgeçlärneñ küptänge farazın iskärtte.

Alfa-Banknıñ neft häm gaz belgeçe Chris Weafer süzlärençä, Rusiä üz yatmaların üsterä almıy şuña kürä Üzäk-Aziä yağulığına moxtac. "Uzğan atnada kinät kenä salqınnar başlanğaç, Rusiäneñ Yewropadağı möştärilärgä östämä yağulıq cibärä almawı açıqlandı. Baqsañ, Rusiäneñ gaz baylığı ul qädäre küp tügel, çönki ul üzeneñ gaz citşeşterüen üsterä almıy. Şuña kürä aldağı 4-5 yılda Yewropa östämä gaz taläp itsä, ul Rusiädän tügel, ä Üzäk Aziädän, Törkmänstan belän Üzbäkstannan kiläçäk," di Chris Weafer.

Mäskäw belän Kiev arasındağı gaz nizağın axır çiktä şul Üzäk Aziä gazı xäl itte. Taraflar anı Rusiä gazına nindi külämdä quşu mäsäläsendä kileşte.

Yewropağa gaz quuçı il bularaq, Ukraina Niazovnıñ Mäskäw säyläşülärendä dä qatnaştı. Yäkşämbedä Niazov Ukrainanıñ yağulıq ministrı häm Naftogaz şirkäte başlığı belän oçraştı. Gaz uyınnarında härkemneñ üz mänfäğäte.

Ali Gilmi
XS
SM
MD
LG