Salqınnar kitärgä ölgermäde, Tatarstanda kümäkläp çañğı şuu bäygesenä çığarğa çaqıru yañğıradı. Bötenrusiä küläm ütkärelä torğan bu yarış Tatarstanda, 5 fivral könne, Qazan su yılğası tiräsendä başlanaçaq. Bıltır anda 10 meñ keşe qatnaşqan bulsa, bıyıl inde 8 meñennän ğarizalar kilgän, ä barlığı 10-12 meñläp keçe bulır dip farazlana. Bu xaqta, pänceşämbe könne Qazan şähär fizik kul’tura komitetı başlığı İlgiz Färxiev xäbär itte. Çañğı şuu bäygesendä härkemgä qatnaşırğa täqdim itelä.
Andıy populär sport yarışlarında barlıq deputatlıqqa nämzätlär qatnaşırmı yuqmı äle tögäl bilgele tügel, ämma aldağı yıllarda, xakimiät wäkilläre andıy kümäkläp ütkärelä torğan yögerülärne qaldırmıylar ide.
Saylawlar ütkän yılnıñ közendä genä buldı diärsez. Şulay da, ämma yañadan, martta Qazanda häm respublika buylap ber niçä distä okrugta, qayadır tawışlar citmiçä, citäkçelär alışınıp häm başqa säbäplärdän, yañadan saylawlar ütkäreläçäk. Qazanda, andıy östämä saylar ütäse okruglar öçäw. Qazandağı Wahapov okrugında, elekke Qazan şähär idäräse başlığı Kamil İsxaqov saylanğan ide. Ämma ul waqıtta, tormışlarnıñ alay kisken üzgärep kitüen ber kem kötmäde. Kamil İsxaqov dekabergä qädär deputat buldı da, soñınnan wazifalarınnan azat itelde. Xäzer näq şuşı okrugta saylawlarğa İlsur Metşin üzen nämzät itep kürsätkän. Anıñ saylawlarda ciñep çığuında şiklänüçelär äz.
Bu saylaw häm başqa saylaw okruglarında köräş qızıqlı bulırğa oşıy. Ber nämzät İlsur Metşin bulsa, annan başqa, Samiğullin Mansur isemle kommunistlar wäkile bar häm üzen bäysez kandidat itep kürsätkän İrek Mortazinnı da kürep bula. Ber urın öçen barlığı 8 keşe däğwä itä.
Safiullin okrugında böten saylawlarda da qatnaşa torğan Dmitriy Berdnikov xalıq wäkile bulırğa teläwen beldergän.Anıñ köndäşläre arasında, waq çinovniklar, pensioner, buxgalter, eşmäkär häm «Tatmedia» agentlığı başlığı Marat Moratov isemle zur citäkçene dä kürep bula.
Qazan artı okrugında isä, Berdnikov äfändeneñ, tormış iptäşe Olga xanım, «Tormış» firkäse başqarma komitetı başlığı Xaliullin Mirdaxim äfände, «Alma»çılar firqäsennän Ruslan Zinnätullin ber deputat kenägäse öçen köräşä. Nämzätlär arasında «Näfis –kosmetiks» kebek Rusiä külämendä eşli torğan bik ere häm bik bay şirkät citäkçese Xäybullin Dmitriy äfändene dä kürep bula. Ul da, Şähär Duması deputatı bulırğa teli.
Nämzätlär inde terkälgän, öndäw kampaniäse fivral urtalarında başlana. Ä şähär başqarma kometetı başlığı İlsur Metşinnıñ eşçänlege xaqındağı reportajlar, inde yaña yılda birle, här könne televizor ekrannarında bara.Öndäw öçen räsmi röxsät itelgän waqıtı citkäç, saylawçılar, başqa nämzätlärne küräçäk.
