Uzğan programmabızda Ul'yanovski şähärendäge ber xärbi bülekne taşlap Başqortstanğa qaytqan 4 yeget xaqında mäğlümatlar birgän idek inde. Fevral' başında Ul'yanovski şähärendä xezmät itüçe dürt soldat yeget Ufağa qaçıp qayta. Alar üzläreneñ xärbi büleklären taşlap qaytuların anda alarğa qarata köç qullanu häm qurqıtu belän añlattı. Dürt yegetneñ ikese Başqortstannıñ üzennän. Aleksey Vinidiktov Ufa yegete, ä Ruslan Safin – Uçalı şähärennän. Tağın ike soldatnıñ berse kürşe Perm ölkäsennän, ä ikençese Smolensk ölkäsennän.
Ul'yanovski xärbi bülegen qaldırıp Ufağa qaytqan yegetlär biredä tuıp üskän Aleksey Venediktovnıñ äti-änise yäşägän fatirğa qaytıp sıyına. Qaytqannıñ ikençe könendä ük, Aleksey Vinidiktov başqalanıñ Kirov rayonı xärbi komissariatına bara häm üzläreneñ Ul'yan ölkäsennän qaçıp qaytuları säbäplären añlata. Soldatlar üzläreneñ xärbi bülektäge starşina Niqolay Konişçev tarafınnan törleçä mısqıl itelüe häm anıñ üterü belän qurqıtuı xaqında belderä. Şunnan soñ Başqortstan xärbi komissariatı wäkilläre Ul'yanovskidağı xärbi bülek citäkçeläre belän elemtägä kerä. Ämma andağı xärbi bülek komandirı urınbasarı Vadim Şvıyd'ko üzlärennän qaçqan soldatlar yalğan söyli, dip qırt kisä. İmeş, alar berniçä kön xärbi bülektän çığıp irektä yörgän häm anda soñlap qaytqannarı öçen, kisätü alğannan soñ, üzlären aqlaw öçen “äkiät” uylap çığarğan.
Şulay itep, älegä kemneñ döres, ä kemneñ yalğan söyläwen açıqlaw irtäräk. Şulay da Ufağa qaytqan soldat yegetlär sud häm meditsina tikşerüe ütkän. Bu tikşerüneñ näticäläre aldağı düşämbedä mäğlüm bulaçaq, dilär.
Comğa irtäsendä “Azatlıq” radiosı xäbärçese, Ul'yanovskidan xezmät urınnarın qaldırıp qaytqan soldatlarnıñ xälen belü öçen, alar Ufada tuqtalğan fatirğa telefonnan şaltırattı. Telefonnı Alekseynıñ qartinäse El'wira Sergeevna aldı. “Sez beraz soñladığız inde, soldat yegetlärebezne Ul'yanovskidan kilgän xärbilär tönlä alıp kittelär”, - dide ul. El'wira Sergeevna süzlärençä, Ul'yanovskidan, soldatlar xezmät itkän çast'tän ike xärbi kilgän häm soldatlarnı kire üz çast'larına qaytırğa ügetlägän. “11 fevral'gä qädär çast'kä qaytıp citsägez, sezgä bernindi dä cäza birelmäyäçäk”, dip ışandırğan alar. Menä şunnan soñ uzğan töndä dürt soldat häm alarnıñ anaları bergäläp Ul'yanovskiğa çığıp kitkän. “Ul'yanovskidan kilgän xärbi citäkçelär belän minem qızım, onığım Alekseynıñ änise Marina söyläşte”, - di El'wira apa.
El'wira:Marina Ul'yanovskidan kilgän xärbilär belän söyläşte. Xärbilär: “Yegetlär üzläreneñ xezmät urınnarına qaytırğa tieş, barı tik şunda ğına kemneñ ğayıple ikänen açıqlap bulaçaq häm ğayıple keşelärgä cäza birü mömkinlege bulaçaq”, - dip äytkän. Şuşı ışandırudan soñ, soldatlar üzläreneñ äniläre belän tönlä Ul'yanovski poyezdına çığıp kitte. Bu waqiğalar närsä belän betär inde, äytüe qıyın.
El'wira xanımnıñ onığı häm anıñ belän bergä Ufağa qaytqan soldat dusları yazmışı öçen borçıluın añlap bula. Xärbi bülektä soldatlar östennän bernindi cäberläw dä bulmağan, dip bügennän ük täqrarlap torğan xärbi citäkçelärneñ aldağı könnärdä dä, mäs’äläneñ töbenä töşmiçä, üz fikerendä qaluı ixtimal. Biredä ber närsä genä yärdämgä kilergä mömkin – soldat yegetlärneñ Ufadağı sudmedekspertiza tikşerüeneñ uñay näticäläre genä. Yäğni alarnıñ çınlap ta cäräxätlär aluı turındağı mäğlümatlar.
Fänis Fätxi, Ufa
